Бугун, 3 октябр куни Ўзбекистон Республикаси Президентининг Венгрияга ташрифи доирасида икки мамлакат ишбилармон доиралари иштирокида Ўзбекистон-Венгрия бизнес-форуми бўлиб ўтди.

Бизнес-форумда Ўзбекистон ва Венгриянинг автомобилсозлик, транспорт, фармацевтика, қишлоқ хўжалиги, тўқимачилик, ахборот технологиялари, чарм саноати каби соҳалардаги етакчи компаниялари, банк ва молия институтлари раҳбарлари иштирок этди.

Ўзбекистон-Венгрия бизнес-форуми доирасида «Ўзбекистон Республикаси Ташқи иқтисодий фаолият миллий банки» АЖ ва Венгриянинг экспорт-импорт банки ўртасида 50 миллион евролик кредит линиясини жалб этиш бўйича шартнома имзолади.

Венгрия Эксимбанки экспортни молиялаштириш соҳасида етакчи молиявий институт ҳисобланади. Жалб этилган кредит линияси йирик инвестиция лойиҳаларини ҳамда Венгриядан асбоб-ускуналар, товарлар ва хизматлар етказиб беришни кўзда тутувчи кичик ва ўрта бизнес лойиҳаларини молиялаштириш имконини беради.

Венгрия Ўзбекистоннинг Европа Иттифоқидаги муҳим ҳамкорлардан бири ҳисобланади. Икки давлат раҳбарларининг ташаббуслари туфайли ўзаро манфаатли шериклик муносабатлари йилдан-йилга мустаҳкамланиб бормоқда. Бизнес-форум якунлари бўйича эришилган келишув ва шартномаларни ҳаётга татбиқ этиш имконини берувчи Венгрия Эксимбанки билан имзоланган янги шартнома бунга амалий мисол бўла олади.

Шартноманинг афзалликларидан бири, Венгрия Эксимбанк гуруҳига кирувчи MEHIB экспорт кредитларини суғурталаш компанияси билан тўғридан-тўғри ҳамкорлик қилиш имконияти юзага келишидир. Ушбу ҳамкорлик ускуналарни ишлаб чиқариш, етказиб бериш, тўланмаган қарзлар, етказиб берувчи ёки харидор кредитлари, лизинг, банк кафолати ва инвестициялар билан боғлиқ рискларни молиялаштиришни таъминлайди.

Тадбир давомида эришилган келишувларнинг амалга оширилиши Ўзбекистон ва Венгрия ўртасидаги ўзаро товар айирбошлаш ҳажмини ошириш, мамлакатларимизда қўшимча янги иш ўринлари яратишни рағбатлантиради.