АҚШ президенти Жо Байден Fox News телеканали журналистининг Россия президенти бўйича саволини аҳмоқлик деб атади. Бу ҳақда оқ уй матбуот хизмати маълум қилди.

Байден Оқ уйда Президент ҳузуридаги Фан ва технология кенгаши аъзолари билан учрашув ўтказган. Тадбир аввалида залда оммавий ахборот воситалари вакиллари чақирилган. Журналистлар тадбирни тарк этаётганларида, Fox News вакили Байденга: «Нега Путиннинг биринчи қадам қўйишини кутяпсиз?», дея савол берган. (Журналист катта эҳтимол билан Россиянинг Украинага бостириб кириши мумкинлиги бўйича прогнозларни назарда тутган)

Бунга Байден: «Қандай аҳмоқона савол?», дея жавоб берган.

Оқ уй матбуот хизмати савол қайси контекстда берилганига аниқлик киритмаган, аммо Америка раҳбари аввалроқ Украина атрофидаги вазиятни дипломатик йўл билан тартибга солишга интилаётганликларини бир неча бор таъкидлаганди.

Охирги бир неча ой давомида Ғарб матбуоти ва Украина Россия гўёки Украинага «кенг кўламли босқин»га тайёрланаётганини даъво қилиб келмоқда.

Москва томони эса буни қайта-қайта рад этди.