Хабарлар тезкор Телеграм каналимизда Обуна бўлиш ×

«Rayyona Qutlug‘» раҳбарларидан бири йиғилган пуллар билан қочиб кетди (видео)

Сешанба, 9 август, 2022 йил. Таҳририятнинг одатдаги иш куни сайт ўқувчилари томонидан келиб тушган мурожаат билан бошланди...

Унда айтилишича, офиси Тошкент шаҳрида жойлашган «Rayyona Qutlug‘» фирмаси 300 нафарга яқин одамлардан турли миқдордаги пулларни йиғиб, уларга уй ва автомобил олиб беришни ваъда қилиб келгани, бироқ белгиланган муддат ўтиб кетган бўлишига қарамасдан, берилган ваъдалар бажарилмагани, бу ҳам етмаганидак, жорий йилнинг 4 август куни фирма раҳбарларидан бири ҳисоб рақамда йиғилган пулларни ечиб, чет элга қочиб кетган.

Фирма раҳбарларидан бири, дейишимизга асос бор: фирмани жорий йил март ойидан буён бошқариб келаётган «документальный» раҳбари шу ерда, Тошкентда. Бу ҳақда кейинроқ...

Мурожаат бўйича вазиятни ўрганиш учун мухбиримиз «Rayyona Qutlug‘» офисига борди. Бироқ у ерда фирма ходимларидан ҳеч кимни топиб бўлмади, аммо кутилганидек, 60 нафарга яқин жабрланганларга дуч келинди.

Улардан ҳолатни билиш мақсадида суҳбатга тортганимизда аксарияти бошланғич тўловларни (автомобиллар учун ўртача 4-5 минг АҚШ доллари, уйлар учун эса ўртача 15-17 минг АҚШ доллари) турмуш ўртоқларидан, оила аъзоларининг айримларидан яширин ёки рухсатсиз тўлагани, шу сабаб видеотасвирда юзлари чиқмаслиги кераклигини таъкидлашди. Буёғи ўзбекчилик.

Акмал, жабрланувчи, Қашқадарё вилоятидан:

— «Rayyona Qutlug‘» фирмаси ҳақида интернет орқали хабар топганман. Аввалига ишончсиздай туюлган эди, бироқ келиб кўрганимда бу ердагиларнинг мижозларга муомаласи, тўловларнинг банк орқали қилиниши ва айрим мижозларга берилаётган уй ва машиналар уларга бўлган ишончимни орттирди. Қолаверса, фирма хизматларини исломий шартларда таклиф қилгани ҳам уларга ишонишимга қайсидир маънода туртки бўлди.

Улар менга 4 йилдан бери ишлаётган фирма эканлигини айтишганди. Энди билишимизча, очилганига 8 ой бўлган экан. Ҳозир раҳбарларидан бири банкдаги пулларни ечиб, Озарбайжонга қочиб кетганмиш.

Мен 1 август куни уйга 10 йилга бўлиб тўлаш шарти билан бошланғич 120 миллион сўм тўлов қилганман.  

Озода, жабрланувчи. Сурхондарё вилоятидан:

— Тўйга деб йиғиб юрган пулимизни олиб келиб бергандим. Фоизсиз, пениясиз дейишгани учун турмуш ўртоғимга совға бўлсин деб, ундан рухсатсиз шу ерга тўлов қилганман.

Бу ерга келганимда одамлар 20 минг долларлаб уйга тўлов қилаётганларини кўриб, ишониб қолдик. 5 нафар бўйи етган фарзандларим бор, уларнинг тўйлари учун йиғиб юрган пулларимга озроқ қарз кўтариб, жами 5 минг доллар тўлов қилгандим. Энди ҳаммасига куйиб ўтирибман.

Муқаддас, жабрланувчи. Тошкент шаҳридан:

— Биз ҳам интернет орқали хабар топгандик. Аввалига ишонмадик, аммо бу ердагилар шунақа муомала қилишди ва хизматлари ҳақида айтиб беришдики, оқибатда яшаб турган уйимизни сотиб, бошланғич тўлов – 90 кв.м майдонга эга хонадон учун 170 миллион сўмни тўлаган эдик. Уч нафар ўғлим бор. Турмуш ўртоғим билан келишиб, уйни кенгайтирмоқчи эдик. Улар истасак кўп қаватли уйлардан хонадон, истасак ҳовли-уй олишимиз мумкинлигини айтишди. Биз масаламиз осон ҳал бўлаётганидан, шундай ҳожатбарор кишилар бор, деб хурсанд бўлиб юраверибмиз...

Муқаддас пулларни олиб қочиб кетган фирма раҳбарларидан бири – Гулямов Зафар (у ўзини мижозларга Абдуллоҳ деб таништирган) билан ўша куни ҳам Telegram орқали ёзишганини айтади. Бизга тақдим қилинган скриншотларда кўринишича, ўзини «Абдуллоҳ» деб таништирган ва айни пайтда Баку шаҳрига қочиб кетгани айтилаётган Гулямов Зафар унга ўзининг соғлиғидаги муаммолари сабабли Ҳиндистонда экани, хавотир олмаслиги, ҳаммаси жойида бўлиши ҳақида таскин берувчи гапларни айтади.

Мазкур ҳолат бўйича фирма ва фирманинг айни пайтдаги раҳбари – Эгамбердиев Эркинга адвокатлик учун ёлланган Фарҳод Мираҳмедовнинг айтишича, Гулямов Зафар 2022 йилнинг 10 январида «Rayyona Qutlug‘» МЧЖни ташкил қилиб, март ойига қадар бошқариб келган. Шу йилнинг 17 март санасидан бошлаб эса айни пайтда Тошкентда бўлган Эгамбердиевга фирма раҳбарлигини топшириб, ўзи норасмий равишда фирма ишларига бош-қош бўлиб келган. 4 август санасига келиб эса у Эгамбердиевни ҳамкорлар билан учрашиш баҳонасида Москвага учириб юборади ва ўзи фирма ходимларининг банк-карталарига пул ўтказиш ва улардан нақдлаштириб олиш йўли билан фирманинг бор пулларини олган. Сўнг чет элга чиқиб кетган.

«Гулямовда ҳам банкдан пул ечиб олиш учун керакли калит бўлган. Дастлабки ўрганишларимизда фирманинг жами айланмадаги маблағи 17 млрд сўм бўлганини аниқладик. Охирги марта кеча, 8 август куни ҳам 40 миллион сўм пул ечишга уриниш бўлган. Ҳозирда Эгамбердиев томонидан банклардаги ҳисоб рақамларга таъқиқ қўйилди», – дейди адвокат. 

Ўз ўрнида оrginfo.uz сайтида келтирилган маълумотлар билан ҳам танишиб чиққанимизда, «Rayyona Qutlug‘» МЧЖ ҳақиқатда жорий йилнинг 10 январида дават рўйхатидан ўтгани, устав фондида 400 миллион сўм бўлгани ва таъсисчиси Эркин Эгамбердиев, раҳбари Жумабоев Улуғбек эканлиги аниқ бўлди.

Ҳудди шу саволлар билан Эгамбердиевнинг адвокатига юзланганимизда, у буларнинг ҳаммаси сохта имзолар билан Гулямов томонидан уюштирилганини айтмоқда.

Воқеалар ривожини кузатамиз...

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг