Муҳаммад ал-Хоразмий номидаги Тошкент ахборот технологиялари университети ташаббуси билан юртимиздаги мактаб ўқувчилари, талабалар ва дастурлашга қизиқувчи барча ёшлар учун «IT MARAFON – 2021» танлови бошланди.

Дастурлаш бўйича IT MARAFONда дастурчилар оммабоп дастурлаш тилларидан фойдаланган ҳолда мураккаб алгоритмли масалаларни ишлаши керак бўлади.

Ушбу марафон уч босқичдан бўлиб ўтади.

Биринчи босқичда 45 кунлик дастурлаш бўйича билимларни ошириш жараёни амалга оширилади. Бунда ТАТУ профессор-ўқитувчилари томонидан барча иштирокчиларга танловга қўйиладиган масалаларни ечиш бўйича керакли тушунча ва йўриқномалар берилади. 45 кунлик марафоннинг интенсив дарслари бепул онлайн тарзда олиб борилади. Марафон натижалари бўйича юқори кўрсаткичларга эга бўлган иштирокчилар иккинчи ва учинчи босқичларга йўлланма оладилар.

Иккинчи босқич фақат ТАТУ ёки унинг филиаллари биринчи босқич талабалари ўртасида ўтказилади. Унда ТАТУ талабаларининг иштироки таъминланади ҳамда тақдирлаши бўлиб ўтади. Иккинчи босқич 2021 йилнинг январ ойи охирида ТАТУ ва унинг филиалларида ташкил этилади.

Учинчи босқич бошқа иштирокчилардан тузилган жамоалар ўртасида бўлиб ўтади. Ушбу босқичда мамлакатимизнинг барча ёшлари жамоа (3 кишилик) кўринишида қатнашишлари мумкин. Учинчи босқич 2021 йилнинг май ойи охирида Республика миқёсида ўтказилади.

Дастурлаш марафонида 15 ёшдан 30 ёшгача бўлган барча хоҳловчилар иштирок этишлари мумкин. «IT MARAFON-2021» дастурлаш мусобақасининг мукофот жамғармаси 60 миллион сўмни ташкил қилади.

Маълумот учун: robocontest.uz сайтида дастурлаш бўйича ўзбек тилида курслар мавжуд.

Марафаонда қатнашиш учун қуйидаги ҳавола орқали рўйхатдан ўтиш керак: robocontest.uz/register