Joriy yilning 7-8 fevral kunlari Markaziy Osiyo atrof-muhit va iqlim o‘zgarishini o‘rganish universiteti (Green University)da Ekologiya, atrof-muhitni muhofaza qilish va iqlim o‘zgarishi vazirligi huzuridagi Davlat ekologik ekspertizasi markazi tomonidan «Davlat ekologik ekspertizasi faoliyatidagi islohotlar: muammo va yechimlar» mavzusida o‘quv-seminar tashkil etildi.

Tadbirning maqsadi va ahamiyati: tadbirda Ekologiya, atrof muhiti muhofaza qilish va iqlim o‘zgarishi vazirligi, Oliy sud, Bosh prokuratura, Qurilish va uy-joy kommunal xo‘jaligi vazirligi, Markaziy bank vakillari, Davlat ekologik ekspertizasi markazi xodimlari, ekolog-ekspertlari va uning hududiy filiallari rahbarlari hamda NNT va OAV vakillari ishtirok etdi.

Tadbirda muhokama qilingan masalalar: so‘nggi yillarda mamlakatimiz iqtisodiyotida amalga oshirilayotgan keng ko‘lamli islohotlar, modernizatsiya, tarkibiy o‘zgarish va diversifikatsiya jarayonlari, shuningdek, sanoat korxonalari atrof-muhit holatiga sezilarli darajada ta’sir etmoqda. Boz ustiga, sanoat rivojlanishi davrining iqlim o‘zgarishlari kuchayishi davri bilan bir vaqtda sodir bo‘lishi ekologik muammolarni yanada rivojlanishiga sabab bo‘lmoqda.

Ekologik ekspertiza faoliyati ushbu jarayonlarda atrof-muhitni himoya qilishning eng ustuvor va maqbul tadbiri hisoblanib, faoliyat samaradorligi sohaning huquqiy ta’minotiga uzviy bog‘liqdir.

Qabul qilingan qarorlar va amalga oshiriladigan choralar: seminarda davlat ekologik ekspertizasi xulosasini tayyorlash, ekologik ekspertiza xulosasini olmagan korxonalarning huquqiy javobgarligi, arxitektura loyihalarini ishlab chiqishda davlat ekologik ekspertiza xulosasini talab qilish, loyihalarning ekologik xulosasi bo‘lmasdan moliyalashtirilishi to‘g‘risidagi masalalar Oliy sud, Bosh prokuratura, Markaziy bank va Qurilish vazirliklari hamkorligida muhokama etildi.

Ekologik ekspertiza qonunchiligi va huquqiy islohotlar: Ekologik ekspertiza faoliyatidagi asosiy qonunchilik hujjati – «Ekologik ekspertiza to‘g‘risida»gi Qonun qabul qilinganiga chorak asr bo‘lgan. Bugungi kundagi globalizatsiya jarayonlari va ekologik muammolarga javob berish uchun, Qonunning yangi tahrirdagi loyihasi ishlab chiqildi va «Ekologik ekspertiza, atrof-muhitga ta’sirni baholash va strategik ekologik baholash to‘g‘risida»gi yangi Qonun qabul qilindi.

Tadbir yakuni bo‘yicha mavjud muammo va kamchiliklarni hamkorlikda hal etishga yo‘naltirilgan qo‘shma qaror loyihasi qabul qilindi.

Ikki kunlik tadbir yakunida Markaziy Osiyo atrof-muhit va iqlim o‘zgarishini o‘rganish universiteti (Green University) hududida «Yashil makon» umummilliy loyihasi doirasida Davlat ekologik ekspertizasi markazining «ekologik bog‘i» tashkil etildi, unda tadbir ishtirokchilari tomonidan 500 tup manzarali daraxt ko‘chatlari ekildi.