Бинямин Нетаняху 27 сентябр куни Абу-Дабига махфий равишда борди, деб хабар беради Исроил телевидениесининг 12-канали.

Телеканалнинг манбаларига кўра, Нетаняху эрталаб Бирлашган Араб Амирликларига шахсий самолётда борган ва бутун кунни у ерда ўтказган, кечқурун эса уйига қайтган. Канал талқинига кўра, сафарнинг мақсади президент Муҳаммад бин Зайд Ал-Наҳён билан шахсий учрашув бўлган.

Суҳбат мавзуси тафсилотлари очиқланмаган. Нетаняху идораси бу хабарларга изоҳ бермади.

12-канал Нетаняхунинг Абу-Дабига ташрифи БАА президенти уни 7 октябрдаги ҲАМАС томонидан мисли кўрилмаган ҳужум таҳдиди ҳақида шахсан огоҳлантиргани бўйича миш-мишлардан сўнг содир бўлганини таъкидлайди. Исроил бош вазири гўёки бу огоҳлантиришни рад этиб, суҳбатдошига мамлакат Ғазо секторидаги вазиятни тўлиқ назорат қилаётганига ишонтирган.

БАА расмийлари ва Нетаняху идораси илгари бу даъволарни рад этган эди.

Аввалроқ Исроил бош вазири БМТда нутқ сўзлаганда ўнлаб давлатлар зални тарк этгани хабар берилганди. Бироқ БАА вакили зални тарк этмагани айтилган.