Япония ҳукумати Россия президенти Владимир Путиннинг жанубий Курил оролларига ташрифидан сўнг мумкин бўлган жавоб чораларини кўриб чиқмоқда.

​Бу ҳақда Япония жамоатчилик телерадиоэшиттириш компанияси (NHK) хабар берди.

​Кўриб чиқилаётган вариантлардан бири Украинадаги уруш туфайли Япония томонидан жорий этилган Россияга қарши санкцияларни кучайтиришдир.

​Япония жамоатчилик телерадиоси «аллақачон совуқлашган Япония-Россия муносабатлари янада ёмонлашади» деб башорат қилмоқда.

​Аввалроқ Япония Ташқи ишлар вазирлиги Путиннинг Итуруп оролига ташрифи муносабати билан Россиянинг Токиодаги элчиси Николай Ноздревни чақиртирган эди.

​Японияда жанубий Курил ороллари «Шимолий ҳудудлар» деб аталади. Япония тўртта оролга даъво қилмоқда: Кунашир, Итуруп, Шикотан ва Хабомай гуруҳи. Россия бу ороллар устидан ўз суверенитетини сақлаб қолиши ва унга қарши чиқилмаслигини билдирди. Москва 2022 йилда Токионинг Россияга қарши санкцияларига жавобан икки мамлакат ўртасидаги тинчлик шартномаси бўйича музокараларни тўхтатиб қўйган эди.