АҚШ президенти Доналд Трамп антисемитизмга қарши кураш тўғрисидаги фармонни имзолади. Ушбу ҳужжат АҚШ фуқароси бўлмаган шахсларни антисемит ёки Фаластинни қўллаб-қувватловчи намойишларда қатнашгани учун мамлакатдан депортация қилишга қонуний асос яратади.

Оқ уй веб-сайтида эълон қилинган ҳужжат матнида айтилишича, 2023 йил 7 октябрда ҲАМАС ҳаракатининг Исроилга ҳужуми университет кампусларида «мисли кўрилмаган антисемитизм, камситиш, вандализм ва зўравонлик тўлқинини» келтириб чиқарган. Яҳудий талабалари қўрқитиш, жисмоний таҳдид ва таъқибларга дучор бўлишган.

Мазкур фармон федерал вазирлик ва идоралар раҳбарларига 60 кун ичида антисемитизмга қарши курашда фойдаланиши мумкин бўлган янги воситаларни ишлаб чиқишни буюради. Университетлар, шунингдек, хорижлик талабалар ва ходимларнинг антисемитизм ёки терроризмни қўллаб-қувватловчи хатти-ҳаракатлари ҳақида хабар беришга даъват этилади.

Reuters хабарига кўра, ҳужжатга илова қилинган бюллетенда Трамп Фаластин тарафдорлари норозилик намойишларини қўллаб-қувватлаган талабаларни депортация қилиш билан таҳдид қилган.

У, шунингдек, мамлакатда яшовчи ҳамда Исроил-Фаластин можаросида Фаластинни қўллаб-қувватловчи хорижлик талабаларни «қидириб топиб, депортация қилиши»ни айтади.

«Бундан ташқари, радикализм билан тўлиб-тошган университет кампусларидаги барча ҲАМАС тарафдорларининг талаба визаларини тезда бекор қиламан», – дейилган бюллетенда.