ФИФА расмий сайти эълон қилган терма жамоаларнинг янги рейтингида Ўзбекистон 61-ўринга кўтарилди.

Терма жамоамиз 2023 йилни 68-ўринда якунлаган, Қатарда ўтган Осиё кубогидан кейин 66-ўринга кўтарилган эди. Март ойидаги ФИФА кунлари доирасида Гонгконгга қарши ЖЧ-2026 2-саралаш босқичидаги ғалабалардан кейин (2:0, 3:0) Ўзбекистон ЖЧ-2026 ҳал қилувчи саралаш босқичи ва Осиё кубоги-2027 йўлланмасига эга чиқиб, рейтингда 64-ўринга кўтарилганди.

ЖЧ-2026 2-саралаши доирасидаги Туркманистон (3:1) ва Эрон (0:0) билан ўйинлардан кейин яна икки поғона юқорилаб, Ўзбекистон 62-ўринда жойлашди. Июл ойида эълон қилинган рейтингда Ўзбекистон 61-ўринга кўтарилган.

ФИФА рейтингида Америка кубоги эгаси — Аргентина 1-ўринда бормоқда, Франция 2-ўринда қолди. Европа чемпиони — Испания 8-ўриндан 3-поғонага кўтарилди. Англия 5-ўриндан 4-ўринга кўтарилди. Бразилия 5, Белгия 6-ўринга пастлаган. Нидерландия (7), Португалия (8), Колумбия (9) ва Италия (10) ўнликдан жой олган.

Ўзбекистон Осиё жамоалари орасида 8-ўринда: Япония — қитъа етакчиси – 18-ўрин (жаҳонда), Эрон (20) ва Жанубий Корея (23) учликда. Австралия (24), Қатар (34), Ироқ (55), Саудия Арабистони (56), Ўзбекистон (61), Иордания (68) ва БАА (69) кучли ўнликда.

Ўзбекистон миллий жамоасининг ФИФА рейтингидаги энг яхши натижаси — 45-ўрин (2006-2007 йиллар).