Жорий йилнинг 4 март куни Ўзсаноатқурилишбанк томонидан оммавий ахборот воситалари (ОАВ) ходимларини «яшил» молиялаштириш механизми асосида ишга туширилаётган лойиҳалар билан таништириш мақсадида Тошкент шаҳридаги корхоналарга пресс-тур ташкил этилди.

2019 йил 4 октябрда Президентимиз томонидан қабул қилинган «2019-2030 йиллар даврида Ўзбекистон Республикасининг «яшил» иқтисодиётга ўтиш стратегиясини тасдиқлаш тўғрисида»ги қарорига мувофиқ, йилларга мўлжалланган ҳукумат стратегияси ишлаб чиқилди.

Унда «яшил» инвестицияларни қўллаб-қувватлаш, хусусан «яшил» кредитлаш, «яшил» иқтисодиётга ўтиш бўйича лойиҳаларни молиялаштиришда хусусий секторни фаоллаштириш, шунингдек, «яшил» инвестицияларга нисбатан банк тизимини рағбатлантириш масалалари белгилаб олинди.

Ўзсаноатқурилишбанк тизимида ушбу механизм асосида кредитлаш амалиётлари Жаҳон банки билан ҳамкорликда амалга ошириб келинмоқда. 2018 йилга келиб Банк томонидан Халқаро молия корпорацияси ҳамда Европа тикланиш ва тараққиёт банки маслаҳатчилари кўмагида ишлаб чиқилган трансформация дастурида ҳам «Green banking» алоҳида ўрин эгаллади.

Бугунги кунга қадар банк томонидан уч босқичда жами 91 млн. АҚШ долларилик 20 та «яшил» лойиҳа молиялаштирилди.

Хусусан, пойтахтимизда фаолият юритувчи «В.Л.Гальперин» номидаги Тошкент труба заводида турли ҳажмдаги қувурлар, иссиқлик ўтказгичлар (арматура симли новда), маҳкамлагичлар, пайвандлаш симлари, электроид каби маҳсулотларни ишлаб чиқариш лойиҳаси амалга оширилмоқда.

Пресс тур доирасида ОАВ вакиллари бу ерда заводнинг ишлаб чиқариш қуввати, хусусан «яшил» лойиҳа дейилишига сабаб бўлувчи жиҳатлари билан таништирилди.

Қайд этилганидек, объект иқлим ва экология барқарорлигини таъминловчи, энергия тежовчи илғор технологиялар билан жиҳозланган, зарур хом ашё базаси таъминланган. Ишлаб чиқариш қуввати йилига 350 минг тонна пўлатдан ясалган металл буюмлар етказиб беришга тенгдир.

Банк томонидан шу даврга қадар молиялаштирилган ана шундай лойиҳалар ҳисобига металлургия, нефть-газ, кимё, электр энергия ва бошқа тармоқларда 268 975 МВт.с электр энергияси ва 107 080 м3 табиий газ тежалганлигини қайд этиш мумкин.

Пресс-турда журналистларнинг навбатдаги манзили «Pergament quality exclusive» корхонаси бўлди. У ерда меҳмонлар флизелин асосидаги винил гулқоғозлар ишлаб чиқарувчи корхонанинг иккинчи линияси фаолиятини кузатиб, бу ҳақда батафсил маълумот олди.

Лойиҳанинг биринчи босқичида корхона қуввати йилига 2 миллион 640 минг ўрам гулқоғоз ишлаб чиқаришга етган бўлса, эндиликда у бундан 2 баравар кўп ишлаш имконига эга бўлди. Бунинг учун Банк томонидан Халқаро тикланиш ва тараққиёт банки кредит линияси маблағлари ҳисобидан 3 825 000 евро эквивалентига тенг кредит маблағи ажратилди.

Умуман, «яшил» молиялаштириш ер юзининг долзарб экологик муаммоларини ҳал этишга қаратилган илмий-амалий тадқиқотлар маҳсулидир. Бунда муқобил энергетика соҳасида илғор технологиялар ишлаб чиқиш ва амалиётга жорий этиш алоҳида ўрин тутади. Шу боис Ўзсаноатқурилишбанк тизимида ушбу механизм устувор йўналишлардан бири сифатида қабул қилинди. Муассасада кредитлашнинг ушбу усулини яқин истиқболда 70-80 фоизга тенглаштириш белгилаб олинди.

Банк Ахборот хизмати