Навоий вилоят ИИБ ахборот хизмати раҳбари Ўктам Усмоновнинг «Xabar.uz»га маълум қилишича, берилган имтиёзни суистеъмол қилган «ишбилармон»ларнинг кирдикорлари фош бўлиб, қўлга олинган.

Таъкидланишича, 2021 йилда Навбаҳор тумани фуқароси  А.Х.га узумзор боғ барпо этиши шарти билан унга 10 йил муддатга 204.9 гектар ер майдони ажратилган. Бироқ, орадан икки йил ўтса ҳам ушбу ер майдони бўш ва қаровсиз қолиб келаверган.

А.Х.нинг эътиборсизлиги ишлаб чиқариш корхонаси қуриш учун ер майдони излаб юрган маҳалладоши М.К.да қизиқиш туғдирган. У қинғир йўл билан бўлса ҳам ер майдонини сотиб олиш тадоригини кўрган. М.К. фуқаро А.К. билан учрашиб,  муддатли фойдаланиш учун олинган 204.9 гектар ерларни сотиб олишини, бу унга узум ҳосилидан ҳам кўп даромад келтиришини билдирган.  

Меҳнат қилмай туриб, катта даромад топишга иштиёқи ошган А.Х. туман кадастр агентлигининг етакчи мутахассиси билан ҳам «маслаҳатлашган» ва ходимга хизмати эвазига 10 миллион сўм беришини айтган.  Агентлик етакчиси ҳам қонунга чап бериб, ернинг кадастр ҳужжатларини ўзи расмийлаштириб, қурилиш ишлари учун ҳам рухсатнома олиб беришни зиммасига олган. Савдо «пишиб»,  А.Х. муддатли фойдаланиши учун ўзига ажратилган ер майдонини 180 миллион сўмга пуллаётганда ва  кадастр ҳужжати ва рухсатнома учун ходимга 10 миллион сўм пулларни бераётганида қўлга олинган.

«Тадбиркорлик фаолияти учун кенг имкониятлар яратилаётгани ҳеч кимга сир эмас. Уларнинг ҳақ-ҳуқуқлари қонунчиликда ҳам ўзи аксини топган. Афсуски, имтиёзларни қўлга киритгунга қадар ўзини ишбилармонлардек тутиб, сўнг ишончни суиистеъмол қилаётганлар ҳам учраб турибди. Ушбу ҳолат юзасидан хабар келиб тушгач, тезкор гуруҳлар ҳаракат олиб боришди. Вилоят ИИБ ЖҚБ иқтисодий жиноятларга қарши курашиш бўлими ҳамда бошқа ҳуқуқни муҳофаза қилувчи орган ходимлари томонидан «ишбилармон»лар ушланди. Айни пайтда тергов ҳаракатлари олиб борилмоқда»,— деди Ўктам Усмонов.