Иссиқхона бизнеси охирги йилларда жуда урф бўлмоқда. Бунинг учун шароит ҳам етарли, албатта. Иссиқхона бўйича бизнес режа билан мурожаат қилсангиз, банк сизга йўқ демайди. Масалан, ташқи иқтисодий фаолият Миллий банки Сирдарё вилояти Ширин шаҳридаги «Shirin Agro Nur» МЧЖга 700 минг АҚШ доллари миқдорида кредит тақдим этди. Тадбиркорлар эса бу маблағ ҳисобига 1 гектар ерда замонавий иссиқхона қуришди.

Энди иссиқхона қурилишига юзлансак. Ҳозирги кунда турли технологиялар мавжуд ва ўзингиз истаган лойиҳа асосида қурилишни бошлашингиз мумкин. Иссиқхона қуриш билан махсус шуғулланадиган компаниялар бор ва истагингизга биноан хоҳлаган турдаги лойиҳани тақдим этади. Дидингиз, таъбингиз ва албатта чўнтагингизга қараб...

«Иссиқхона лойиҳаси тайёр бўлгандан сўнг компания инженери қурилиш жараёнини назорат қилиб туради. Қурувчиларни ўзимиз ёлладик, компания инженери ҳар куни жараённи кузатиб, кунлик режани тузиб берди. У айтгандек ишладик», — дейди «Shirin Agro Nur» МЧЖ раҳбари Санжар Ашуров.

Иссиқхона тайёр бўлгандан сўнг Эрондан қадоқланган тупроқ олиб келинди. Умуман, буни тупроқ дейиш ҳам қийин, «майдаланган кокос», дея таъриф беришди. Замонавий иссиқхонада помидор, бодринг, гул ва бошқа маҳсулотлар айнан шундай қоришмада етиштирилади. Бир гектар жойга 30 минг долларлик «майдаланган кокос» сотиб олиш лозим. Кейин кўчат ҳам сотиб олинади.

«Бу йил ҳам кўчатни сотиб олдик. Аммо келаси йилдан бошлаб ўзимиз етиштирмоқчимиз. Иссиқхона ёнида бўш жой бор ва у ерда ҳам қурилиш бошлаймиз. Бу борада Миллий банк билан ҳамкорлик бошлашни режалаштириб қўйганмиз», — дейди Санжар Ашуров.

Иссиқхонада ҳамма нарса автоматлаштирилган. Ҳаво намлигидан тортиб ўсимлик ҳолатигача компьютер назорати остида. Лозим бўлганда сув пуркайди, талаб қилинганда эса озуқа беради. Қишда озуқа ҳаражатлари кескин ошиб кетади, бир кунда 1 миллион сўмгача бориб етади. Иситиш тизимига эса ойига 120 миллион сўм атрофида сарфланади.

«Shirin Agro Nur» МЧЖ иссиқхонасидаги помидор меваси октябр ойи охирларига бориб тайёр бўлади. Битта кўчат 6-7 килограммгача ҳосил беради. Биз корхонанинг экспорт салоҳияти билан қизиқдик. «Иссиқхона чиқарган маҳсулот экспорт қилинган тақдирда ўзини оқлайди. Маҳаллий бозор билан шунча ҳаражатни қоплаш қийин», — дейди тадбиркор.