Хабарлар тезкор Телеграм каналимизда Обуна бўлиш ×

Андижондаги автоҳалокат жабрланувчиларидан яна бири вафот этди

Андижондаги автоҳалокат жабрланувчиларидан яна бири вафот этди

Фото: Йўл ҳаракати хавфсизлик хизмати

Шу йил 26 ноябр куни А-373 Тошкент-Ўш-Андижон автомагистралининг 389-390-километрлари оралиғида «Исузу» автобуси ва юк машинаси тўқнашиб кетганди.

Ушбу йўл-транспорт ҳодисаси оқибатида 3 нафар фуқаро воқеа жойида вафот этган, 38 нафар йўловчи турли жароҳатлар билан шифохонага ётқизилганди.

ССВ матбуот хизмати хабар беришича, айни пайтда Соғлиқни сақлаш вазирлиги назоратида бўлган ушбу беморлардан 4 нафарига тиббий хулосалар ижобий бўлгани учун амбулатор шароитда даволаниш учун уйига рухсат берилган.

Ачинарлиси, ўта оғир аҳволдаги яна бир нафар бемор, амалга оширилган реанимацион чораларга қарамасдан, вафот этган.

Ушбу фуқаро шифохонага «Бош миянинг оғир даражада лат ейиши. Мия ўзаги шикастланиши. Қорин бўшлиғи аъзолари ёпиқ жароҳати. Жигар сегментларининг эзилиб ёрилиши. Чап билак суягининг очиқ синиб силжиши. Ўнг болдир соҳаси олд юзаси ва ўнг қўл тирсак соҳаларининг 2-даражали куйиши. 3-даражали травматик шок» ташхиси билан олиб келинган эди. Унда белгиланган стандартлар бўйича барча зарур амалиётлар ўтказилган.

Ҳозирда 33 нафар беморда шифокорлар зарур муолажаларни давом эттирмоқда.

Назоратда турган беморларнинг 11 нафари РШТЁИМ Андижон филиалида, 16 нафари Асака тумани, 4 нафари Бўстон тумани, 2 нафари Шаҳрихон тумани шошилинч тиббий ёрдам бўлимларида даволанмоқда.

Ушбу беморларнинг 1 нафари ўта оғир, 5 нафари оғир аҳволда. Соғлиқни сақлаш вазирлиги уларнинг ҳолатини тўлиқ назоратга олган бўлиб, беморлар зарур тиббий ёрдам ва дори-дармонлар билан тўлиқ таъминланган, дейилади хабарда.

Эслатиб ўтамиз, мазкур ЙТҲ юзасидан Андижон вилояти ИИБ ҳузуридаги ТБ томонидан жиноят қодексининг 266-моддаси 3-қисми «а» банди билан жиноят иши қўзғатилиб тергов ҳаракатлари олиб борилмоқда.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг