Дунёни ифлослантираётган асосий чиқинди пластик эканлиги ҳеч кимга сир эмас. Унинг қоришмалари ва турлари 100 йилдан 500 йилгача ерда ётади. Авлодларимих археологик қазишмаларда 100 йилдан кейин қадимий ёдгорликлар эмас, ишлатилган турли ҳил пластик ва маҳсулотларни топиб, бизнинг ерни ифлослантиришга қўшган ҳиссамизга албатта ижобий баҳо беришмайди.

Шу сабабли Грузия 2018 йил 1 октябрдан 15 микронгача бўлган полиэтилен пакетларни ишлаб чиқарилишини тақиқлади. Молдова 2019 йил январь ойидан полиэтилен пакетлардан воз кечди.

Янги Зеландияда 2019 йил июль ойидан целлофан пакетлардан фойдаланиш тўхтатилди. Жорий йилнинг август ойидан бошлаб Чили, Зимбабве, Австралия, Буюк Британия ва Кения ҳам полиэтилен пакетлардан воз кечишди.

Ўзбекистонда ҳам жорий йилнинг 1 январидан бошлаб юртимизда полиэтилен пакетларни 40 микронгача ишлаб чиқариш ва импорт қилиш, сотувчиларга маҳсулот сотиб олган харидорларга пакетларни бепул тақдим этиш, шунингдек, сотиб олинаётган маҳсулотлар нархига пакетлар қийматини қўшиш ёки уларни таннархидан паст нархларда сотиш тақиқланган эди.

Ўзбекистонда полиэтилен пакетлардан фойдаланишнинг бир йиллик кўрсатгичи 26,2 минг тоннани ташкил этади. Аммо қабул қилинган қарор фақат супермаркетларда амалда бўлиб, бозорларда ҳолат эски ҳаммом эски тослигича қолмоқда.