Ўзбекистон Республикаси Олий Мажлиси депутати Акмал Умирзоқов яна жамоатчилик эътибори марказида!

Шу йилнинг бошида «Тошкент пропискаси очилса, пойтахтда жиноятчилик кўпайиб кетади» мазмунидаги баёноти билан кўпларнинг энсасини (жуда юмшоқ айтганда, албатта) қотирган депутат бу сафар парламент депутатлигига номзодини қўйиш истагини билдирган қатор фаолларни танқид қилган.

Ўз фикрларини «Facebook»даги саҳифаси орқали эълон қилган  Акмал Умирзақов кўп ўтмай матнни ўчиб юборади. Бироқ тармоқнинг чаққон фойдаланувчилари уни  сақлаб  қўйишга улгурди. Депутатнинг ахлоқ меъёрларидан анча четга чиқиб айтган фикрлари кимларга қаратилганини илғаш қийин эмас.  Шунга қарамай биз уни чоп этишни лозим топдик. Зеро, айни матн бугунги айрим депутатнинг маънавий қиёфасига чизги бериши баробарида яқинлашаётган сайловларда қандай номзодларга овоз бермаслик хусусида ҳам хулоса қилишга етгудай.

Демак, сўз салкам беш йилдан буён Олий Мажлиснинг «тупроғини ялаб» юрган депутат Акмал Умирзоқовга (таҳрирсиз берилаётган матннинг имло ва стилистикаси сақлаб қолинди):

«...Депутатликка номзод қўйсам ўтаман, деб фикрлайдиган кети тоза блогеру бировни ҳақини ейишдан уялмайдиган печкачи ва ўзига ўзи «смартгов консултант» дейдиганлар кўпайиб кетти» — деб бошлайди депутат.

У ўзгалар қадрини менсимайдиган оҳангдаги фикрларини давом эттириб: «Қизиқ номзодларнинг турлари… Ҳамма хилидан бор эй… Ҳаттоки, бир «ақлли» бухоролик нимеймиш, депутатлик дастурини ёзгандим, дейди. Аҳад Қаюмми лаҳад луқумми бу блоггер, фарқи йўқ бу масхарабозларга… Депутат манифест ёзадими ҳеч бир дунёда. Яна умидим сўниб боряпти, мен ғалаба қилолмайманмиш. Ўзингча, 13000 подписчик (шундан ярми сохта эккаунт, ярми аллақачон делетед, бўлган) дунёни ҳар бир бурчагидан йиғилиб, сенга мухлис бўлгани кетингни кўтардими дейман. Сайланиш учун камида биласанми қанча сайловчи бўлиш керак бир округда ҳавасманд номзод?! Ўтган сайловда ўртача 165000 эди. Фикр қил, бу рақам сенинг каналингдаги обуначиладан камида ўн икки мартта кўп ва камида шуларнинг ярми сени ёқлаши керак. Саааллл, туш эшагингдан. Эҳҳҳҳ, сайлов нима билмайсанда. Отанг онангга эмас, ўйнашига, онанг идеали учунмас, даданг ёмон кўрган қўшнига овоз беради. Амакиваччанг, холаваччанг нега у энди номзод бўлибди, мани боламни нимаси кам ундан, дейди ҳасад аралаш. Сайлов участкаси жойлашган мактабларда эса, «келажак бунёдкорлари» беш йилда бир ҳосил йиғади. Анақ қиса ука, ман сиз томонга ҳаммани оғдириб берардим, дейди оғзидан вино ҳиди анқиб участка коммиссияси раиси бўлган ўзини локациясини унутган география ўқитувчиси. У бу гапни ҳар бешала номзодга айтиб, сайлов ўтгунча гайгуй қилиб яшайди. У раис ўзича қув, ўзича шустрий бўлади. Сайлов ўтгунча кунора отиб қолиб, маза қилиб яшайди «демократия» саҳнасида. Сайлов кўрмаган кимлардир эса ўзича депутат бўлсам дунёни тескари айлантираман, деганча ўй-хаёл сураверади. Айтганча, депутатлик бу мансаб, мартаба, рутба эмас. Ҳозирдан, номзодимни ўтказишмаяпти, деб жар солманг ўзича» публикага» ўйнайдиганлар. Аллоҳ назар қилмаса, сен ўзингни «смартгов» бўйича мутахассис дейсанми, ёки бошқа эшшшааак бозорга ҳам даллол бўмайсан. Парламент циркка айланишига йўл қўймайди бу заки халқ. Йўл қўймасин ҳам илоҳим»,  —  деб ёзади.