Ўзбекистонда яна айиқ ўлдирилди. Бу ҳақда экологияни ҳимоя қилишга ихтисослашган каналда хабар бериб ўтилди.

«Яна бир ваҳшийлик. «Қизил китоб»га киритилган жонивор, аниқроғи қўнғир айиқ ўлдирилган. Бу воқеа Наманган вилояти Чуст туманининг Ғова қишлоғида содир бўлган. Хабарда айтилишича, «аҳоли ичига бостириб киргач, одамлар уни хонадонга қамаб, овчиларни чақиришган. Овчилар эса уни отиб ўлдиришган. Айиқнинг оғирлиги 250-300 кг. атрофида бўлган».

Биринчидан ёввойи ҳайвон ҳеч қачон одамлар гавжум жойга бостириб кирмайди, иккинчидан, айиқни ўлдирмай, қамашгач, экология қўмитаси, ички ишлар вакилларини чақириш керак эди. Агарда у ҳақиқатан ҳам одамлар ҳаётига хавф туғдирсагина, ўшанда ҳам «Қизил китоб»га киритилган жониворларни Вазирлар Маҳкамасининг қарорига биноангина ўлдириш мумкин.

Ишончимиз комилки, Қашқадарёдаги ҳолатдагидек бу бечора айиқ ҳам «қутурган» деб топилади ва уни ўлдирганлар яна жазосиз қолади. Балки айиқнинг териси қайсидир бойваччани хонадонини безаш учун керак бўлгандир?

Ҳали қаҳратон қиш бошланиб, айиқ озуқа тополмай, одамлар яшайдиган жойга тушадиган ҳолат эмас. Айиқни ухлатиб, тоққа қўйиб юборилса бўларди. Бу сафар айиқни ўлдирганлар жазоланиши керак», — дейилади хабарда.