АҚШда коронавирусга қарши вакцинация 11 декабрда бошланиши мумкин. Буни АҚШнинг амалдаги президенти Дональд Трамп маъмуриятининг вакциналар бўйича маслаҳатчиси Монсеф Слауи маълум қилди, деб ёзади CNN.

Унинг сўзларига кўра, 10 декабрь куни озиқ-овқат ва дори-дармонлар сифатини назорат қилиш бошқармасининг маслаҳат қўмитаси йиғилиши ўтказилиши режалаштирилмоқда. Слауининг фикрича, вакцина тасдиқлангандан сўнг 24 соат ичида вакцинация амалга ошириладиган жойларга етказиш имконияти бўлади.

«Шу боис вакцина тасдиқланадиган куннинг эртаси — 11 ёки 12 декабрь куни амалга ошишини кутмоқдаман», — дея аниқлик киритди Трампнинг маслаҳатчиси.

Аввалроқ Американинг «Moderna» фармацевтика компанияси директори Стефан Бансель ўзлари тайёрлаётган коронавирусга қарши вакцинанинг нархини маълум қилди. Унинг сўзларига кўра, битта доза вакцинанинг баҳоси Европа мамлакатлари учун буюртма ҳажмидан келиб чиқиб 25 — 37 доллар атрофида бўлади.

«Moderna» компаниясининг коронавирусга қарши mRNA-1273 вакцинасининг учинчи босқич синовлари препарат самарадорлигини 94,5 фоиз даражада кўрсатди. Шунда Бансель препарат ишлаб чиқаришнинг бурилиш нуқтасини эълон қилди. «Оралиқ таҳлил натижалари бизнинг вакцинамиз COVID-19 билан касалланишга чек қўйиши мумкинлиги ҳақида биринчи клиник тасдиқни берди», — деди у.