Манхэттеннинг 90-пирсига Гудзон тарафдан 1000 койкага мўлжалланган госпиталь-кема сузиб келди, деб хабар берди «РИА Новости».

Узунлиги учта футбол майдонига тенг келадиган «Comfort» кемаси 12 та операция хонаси, интенсив терапия учун асбоб-ускуналар билан жиҳозланган бўлиб, 1000 та койкани жойлаштириш мумкин.

Тахминларга кўра, кемага коронавирусни юқтирмаган беморлар жойлаштирилиб, шу йўл билан Нью-Йорк штатида шифохоналардаги беморлар сонини камайтиришга эришмоқчи.

Нью-Йорк айни вақтда АҚШда эпидемия маркази ҳисобланади. Ҳукумат шошилинч равишда эпидемия чўққисига ҳозирлик кўрмоқда. Ҳисоб-китобларга кўра, у 3 ҳафтадан кейин бошланади.

Нью-Йорк штатида қўшимча госпиталлар барпо этиш учун муҳандислик қўшини жалб этилган. Негаки ҳукумат шифохоналар беморлар оқимини эплаёлмай қолишидан хавотирланмоқда. Жэйкоб Жавитс экспомаркази ҳам даволаш марказларидан бирига айланади. Уни ҳарбийлар госпиталь сифатида жиҳозлашмоқда. У бугун очилиши режалаштирилган.