Арманистон бош вазири Никол Пашинян 2023 йилда Коллектив Хавфсизлик Шартномаси Ташкилотининг (ОДКБ) ўқув машғулотларини ўтказишдан бош тортишини маълум қилди. Бу ҳақда РИА Новости хабар берди.

«Менимча, бу ерда тушунмовчилик бор, чунки Арманистон Мудофаа вазирлиги КХШТ Бирлашган штаб-квартирасига ёзма равишда Арманистонда ўқув машғулотларини ўтказиш ноўрин эканлигини маълум қилган. Бу машғулотлар Арманистонда ҳеч бўлмаганда бу йил бўлмайди», — дейди Никол Пашинян.

Жорий йилнинг 1 январь куни Россия Мудофаа вазирлиги КХШТ тинчликпарвар контингентларининг «Бузилмас биродарлик-2023» ўқув машғулотлари Арманистонда ўтказилишини эълон қилган эди. Хабар қилинишича, ҳарбийлар шартли ноқонуний қуролли тузилмаларни зарарсизлантириш бўйича ҳарбий ҳаракатлар ва тактик ҳаракатларни биргаликда режалаштириш масалаларини ишлаб чиқиши керак эди.

Маълумот учун, 2022 йилнинг декабрь ойида КХШТ Озарбайжон атроф-муҳит фаоллари томонидан тўсиб қўйилган Лочин йўлаги билан боғлиқ вазиятни ҳал қилиш учун жавобгарликдан бош тортганди. Ташкилот бош котиби Станислав Заснинг қайд этишича, Ереван ушбу вазият юзасидан ассоциацияга мурожаат қилмаган.