Қобулда «Аль-Қоида» етакчиси ўлдирилганидан кейин Байден маъмурияти Афғонистон Марказий банкининг АҚШда сақланаётган қарийб 7 миллиард долларлик хорижий активларини очмасликка қарор қилди. Бу ҳақда Ведомости газетаси хабар берди.

Бу қарор Оқ уй томонидан 31 июль куни «Ал-Қоида» етакчиси Айман аз-Завоҳирий Кобулда учувчисиз учоқ ёрдамида йўқ қилинганидан кейин қабул қилинган.

Операциядан кўп ўтмай, АҚШ Давлат котиби Энтони Блинкен террорчилар етакчиси аз-Завоҳирийга бошпана тутган «Толибон» Вашингтон билан америкалик қўшинларнинг Афғонистон ҳудудидан олиб чиқиб кетилиши билан якунланган келишувларини бузганини айтган. Бунгача февраль ойида Оқ уй музлатилган активларнинг ярмидан афғон аҳолисига ёрдам бериш учун фойдаланишга рухсат берган эди.

Оқ уйнинг «Толибон» билан музокаралардаги муваффақиятнинг дастлабки белгиларини йўққа чиқариши, Афғонистон иқтисодиётини тиклаш имкониятини хавф остига қўйиши ва аҳолининг очликдан нобуд бўлишига олиб келиши мумкин.

Маълумот учун, 2021 йилнинг август ойида «Толибон» ҳокимиятни эгаллаб олгач, АҚШ Афғонистоннинг хориждаги 7 миллиард доллар миқдоридаги активларини музлатиб қўйган эди.