АҚШдаги католиклар черкови руҳонийси 51 ёшли Лоуренс Козакнинг икки жиҳати фош бўлди: биринчиси, мобил телефонда ўйинларга муккасидан кетган (шахсий иши), иккинчидан, ана шу ўйинларни сотиб олишга черковнинг кредит картасидаги пулларни сарфлаб юборган — бунисини черков ва жамоатчилик кечирармикан.

Руҳоний ота қизиқадиган мобил ўйинлар — Candy Crush, Mario Kart Tour, Pokemon Go, Cash Frenzy, бундан ташқари, автомат қурилмалардаги турли ўйинлар.

Лоуренс Козак 2019 йил сентябридан 2022 йил июнигача мобил ўйинларга оз эмас, кўп эмас, нақ 41 879 доллар сарфлаб юборгани аниқлангач, устидан иш очилди. Қолаверса ўзининг 10 600 долларини ҳам шу мақсадда ишлатиб юборгани мобил ўйинларга нечоғлиқ қарамлигидан далолат беради.

Козак билан шуғулланаётган терговчиларнинг маълум қилишича, Пенсилвания штатидаги Поттстаун черкови ҳисобчиси Лоуренсга тегишли Apple ID идентификаторидан фойдаланилиб анчагина миқдордаги маблағлар транзакция қилинганини 2022 йилда сезиб қолган.

Руҳоний Amazon тизимидаги аккаунти орқали ҳам харидлар қилган. Аммо унинг ўзи барча айбловларни рад этмоқда, айтишича, шахсий картаси ҳам, эҳсон картаси ҳам унинг айфонига уланган бўлган.

Ўтган ҳафтада руҳонийга айблов эълон қилинди. 250 минг доллар кафолат пули тўлангач, уни судга қадар қўйиб юборишди.