Футбол бўйича Клублар ўртасидаги жаҳон чемпионатининг қуръа ташлаш маросими ўтказилди. Чемпионатда олти жамоа қатнашади.

Турнирга 2021 йилнинг февралида Қатар мезбонлик қилади.

Клублар ўртасидаги жаҳон чемпионатида аслида етти жамоа иштирок этиши керак эди — қитъа чемпионлари ва мезбон сифатида Қатарнинг «Ал-Дуҳайл» жамоаси.

Турнир низомига кўра, «Ал-Дуҳайл» 1/8 финалда «Окленд» (Янги Зеландия)га қарши тўп суриши белгиланганди. Бироқ янги зеландияликлар турнирда қатнашишдан бош тортишди. Шу боис мусобақа чорак финалдан бошланадиган бўлди. Европа Чемпионлар лигаси ғолиби «Бавария» ҳамда Либертадорес кубоги соҳиби эса яримфиналдан турнирга қўшилади.

Клублар ўртасидаги жаҳон чемпионати чорак финали жуфтликлари (ўйинлар 4 февраль куни ўтказилади):

• «Тигрес» (Мексика) — «Улсан» (Жанубий Корея)
• «Ал-Дуҳайл» (Қатар) — «Ал-Аҳли» (Миср)

Дастлабки ўйин ғолиби яримфиналда (7 февраль) Либертадорес кубоги ғолиби билан учрашади (Кубок соҳиби 30 январь куни Бразилиянинг «Палмейрас» ва «Сантос» клублари ўртасидаги ўйиндан сўнг аниқ бўлади). Иккинчи ўйин ғолиби эса яримфиналда (8 февраль) «Бавария» (Германия)га қарши тўп суради.

Финал ҳамда 3-ўрин учун баҳслар 11 февралга белгиланган.

Барча ўйинлар Қатардаги 2022 йилги Жаҳон чемпионатига мўлжалланган стадионларда бўлиб ўтади.