Сирдарё вилояти, Ховос шаҳарчасида истиқомат қиладиган Ш. Хамидова (номи ўзгартирилган) ўз қўшнисининг уйини ўмаргани ҳақида хабар берган эдик. Бу борада суд ҳукми ўқилди.

Ш.Хамидова 2019 йил 25 апрель куни кўшниси Б.Очилованинг уйида ўтказилаётган хашарга келган Л.Юнусованинг уйида йўқлигидан фойдаланиб, унинг яшаш хонадонидаги қўшимча орқа эшигини очиб, хонадонига яширин равишда кирган. Шундан сўнг ётоқхонада жойлашган шкаф ичида турган аёллар қўл сумкаси ичидаги 1.000 АҚШ доллари, 1.325.000 сўм миқдоридаги пул, бир дона 2.200.000 сўмлик тилла занжир, бир комплект 1.600.000 сўмлик оч яшил кўзли тилла узук-сирға, бир комплект 1.600.000 сўмлик тўқ тилла узук-сирға ва бир жуфт 300.000 сўмлик болалар тилла сирғаларини, ҳаммаси бўлиб 15.466.360 сўмлик мол-мулкларини яширин равишда талон-торож қилиб, воқеа жойидан яширинган.

Мазкур жиноят иши жиноят ишлари бўйича Ховос туман судининг сайёр суд мажлисида кўриб чиқилди.

Суд судланувчининг аёл киши эканлигини, муқаддам судланмаганлигини, қилмишидан чин кўнгилдан пушаймонлигини, етказилган моддий зарарларни тўлиқ қайтарилганлигини, туман хотин-қизлар қўмитаси раисининг кафиллик хатини инобатга олиб судланувчига Ўзбекистон Республикаси ЖК нинг 57-моддасини қўллаб 1 йил муддатга ахлоқ тузатиш ишлари жазоси тайинланди.

Отабек Набиев

Жиноят ишлари бўйича Ховос туман суди раиси