Тошкентда маҳкум ярим тунда пичоқ билан аввал ўзининг билакларини тилган ва сўнг ИИБ ходимларига таҳдид қилиб, уларни қувлаган.

Бош прокуратура Матбуот котиби берган маълумотга кўра, жорий йил 13 август куни соат 23:00да тунги хизматда бўлган Янгиҳаёт тумани ИИБ икки нафар профилактика инспекторлари тушган хабар асосида ўша ҳудуддаги хонадонларнинг бирига боришган.

Хонадонда етиб келгач, пробация хизматида ҳисобда турувчи 35 ёшли маҳкум маст ҳолда турмуш ўртоғи билан жанжаллашиб, қувиб юрганини кўришган ва уни тинчлантирмоқчи бўлишган.

Бироқ, маҳкум уларга фаол қаршилик кўрсатган ва бу жараёнга унинг турмуш ўртоғи ҳамда онаси аралашиб, профилактика инспекторлари хизмат кийимларини йиртишган.

Шу пайтда маҳкум уйидан ошхона пичоғини олиб чиқиб, иккала қўли билак соҳасини кесиб ўзига тан жароҳати етказган ва профилактика инспекторларига пичоқ билан таҳдид қилиб, қувлаган.

Шу вақт, профилактика инспекторлари томонидан қўшимча ёрдам ҳамда тез тиббий ёрдам ходимлари чақирилган ва жабрланган маҳкум шифохонага олиб кетилган.

Мазкур ҳолат Янгиҳаёт тумани прокуратураси томонидан текширилиши ва қонуний қарор қабул қилиниши маълум қилинди.