Шимолий Корея — ёпиқ, ўзига хос қонунларга эга бўлган мамлакат. Мамлакатда спорт бир қадар ривожланган, шу жумладан футбол ҳам. Ўз вақтида Ўзбекистон термасини ҳам мағлубиятга учратишни эплашган...

2010 йилда мамлакат терма жамоаси ўз тарихида иккинчи бор Жаҳон чемпионатида қатнашди. Қизиғи, дастлабки ўйинда яхши ўйнаган терма ўйини КХДРда намойиш этилмади. Шимолий Корея Бразилияга қаршилик кўрсатиб, кичик ҳисобда енгилди, ҳатто гол урди...

Шундан сўнг, мамлакат масъуллари чемпионатининг қолган ўйинларини эфирга узатишга қарор қилишди. Аммо қолган икки ўйинда Шимолий Корея шармандаларча мағлубиятга учради: Португалиядан жавобсиз еттита гол қабул қилиб олди,  Кот-д`Ивуар ҳам аямади.

Жамоа КХДРга қайтгач, ОАВда қизиқ ва таҳликали хабар тарқалди: бош мураббий Ким Чон Хон коммунистик партия сафидан ўчирилиб, оғир қурилиш ишларига сафарбар этилган, ўйинчиларга нисбатан ҳам шундай йўл тутилган. Бундай йўл тутишга шахсан юқори раҳбариятдан топшириқ бўлгани иддао қилинган.

ФИФА мазкур иш юзасидан КХДРга сўров жўнатган, шундан сўнг, футболчилар қўйиб юборилган.

Кеча Ўзбекистон терма жамоаси ўз тарихида энг ёмон натижани қайд этиб, ЖЧ-2022дан қуруқ қолди. Албатта, бизда ҳеч ким футболчиларни оғир ишларга сафарбар қилмайди. Бизда бари бошқача.

Аммо бизнинг фуболчиларга нима етишмайди? Яшаш ва машғулот олиб бориш шароитларига ҳавас қилгулик. Ортида 35 миллион жафокаш халқ. 

Бу саволларга яқин орада жавоб топа олмасак керак.