NASA Yer yaqinidagi ob’yektlarni o‘rganish markazining xabar berishicha, shu hafta oxiriga qadar kattaligi 100 metrgacha keladigan bir nechta asteroid Yerning yonidan uchib o‘tadi.

Markaz tomonidan taqdim etilgan ma’lumotlarga ko‘ra, 28-yanvar kuni 2021 BZ asteroidi Yerdan taxminan 2,2 million kilometr uzoqlikda o‘tib ketadi. Uning o‘lchamlari — 29 — 65 metrgacha. U Toshkent vaqti bilan taxminan soat 9:12 larda Yerga yaqinlashadi.

Sal kattaroq 2021 AG7 asteroidi (47 — 110 metrgacha) esa juma kuni Yerning yonidan uchib o‘tadi. Kutilayotgan parvoz vaqti — Toshkent vaqti bilan 13:50 lar. O‘rtadagi masofa Yer bilan Oy o‘rtasidagi masofadan 11 barobar uzoqroq. 29-yanvardan 30-yanvarga o‘tar kechasi Toshkent vaqti bilan soat 00:37 da Yerdan yanada uzoqroq masofada o‘lchamlari 24 — 53 metrgacha bo‘lgan kichikroq 2021 AF7 asteroidi o‘tib ketadi.

Yana ikkita 2021 AL va 2021 BD3 asteroidlari esa bugun sayyoramizning yonidan uchib o‘tdi. Ulardan kichikrog‘i (19 — 43 metrgacha) Toshkent vaqti bilan soat 14:58 da, kattarog‘i esa Toshkent vaqti bilan 6:01 larda qayd etildi. Uning o‘lchamlari — 67 metrgacha.