Toshkent shahar IIBB xodimlari firibgarlikda gumonlanuvchi va tergovdan yashirinib yurgan shaxsni qo‘lga olishdi.

Zafar J.ning arizasiga ko‘ra, joriy yilning aprel oyida Toxir T. metall mahsulotlarini yetkazib berish bahonasida Zafar J.dan 6 mln 600 ming so‘m olgan. Ammo kelishilgan muddatda Zafar hech qanday metall mahsulotlarini olmagan. Pullar ham qaytarib berilmagan.

Mazkur fakt asosida joriy yilning 28-iyul kuni Uchtepa tumani prokuraturasi tomonidan O‘zbekiston Respublikasi Jinoyat kodeksining 168-moddasi 1-qismi («Firibgarlik») bo‘yicha jinoiy ish qo‘zg‘atildi. Gumonlanuvchining turar joyini aniqlash uchun Uchtepa tumani IIO FMB jinoyat qidiruv xizmatiga alohida topshiriqlar berildi. Gumonlanuvchi propiska qilingan manzilida yashamas edi.

2020 yilning 4 sentyabr kuni Toxir ayblanuvchi sifatida jinoyat ishiga sirtdan jalb qilindi, unga nisbatan qamoqqa olish ehtiyot chorasi qo‘llanilib, qidiruv e’lon qilindi. 2020-yilning 1-oktyabr kuni tezkor-tergov tadbirlari natijasida Toxir T. qo‘lga olindi. Tergov davom etmoqda.