O‘zbekistonda onlayn kredit xizmatlar va marketpleysni o‘z ichiga olgan birinchi innovatsion platforma ishga tushirilganiga bir yil to‘ldi. Shu munosabat bilan platforma mijozlari uchun yangi xizmatlar ishga tushirildi.

2020-2025 yillarga mo‘ljallangan O‘zbekiston Respublikasining bank tizimini isloh qilish strategiyasiga muvofiq, O‘zsanoatqurilishbank tomonidan o‘tgan yilning may oyida JOYDA mobil ilovasi ishga tushirilgan edi. Platformada an’anaviy chakana bank mahsulotlari va xizmatlari bilan bir qatorda kichik va xususiy biznes sub’yektlarining tovarlarini sotishga mo‘ljallangan elektron savdo maydonchasi ham yaratildi.

Bugungi kunga kelib platforma o‘z atrofida savdo va xizmat ko‘rsatish korxonalari, sug‘urta kompaniyalari, to‘lov integratorlari hamda yetkazib beruvchilarni onlayn savdo yo‘lida birlashtirgan. U yerga jalb qilingan birgina savdo-servis korxonalari va ishlab chiqaruvchilar soni yuztaga yetkazilib, ular tomonidan 20 mingta mahsulot joylashtirildi, umumiy qiymati 12,8 mlrd. so‘mlik tovarlar xaridorlarga yetkazib berildi.

Xususan, “Inmart savdo markazi” korxonasi tomonidan JOYDA platformasi orqali o‘tgan qisqa davrda 1408 ta tovar, shu jumladan, 266 ta elektr skuter, 164 ta kir yuvish mashinasi, 293 ta muzlatgich, 219 ta televizor, 95 ta konditsioner kabi mahsulotlar sotildi.

Hozirgi kunda platformadan foydalanuvchilar soni 340 ming kishiga yetdi. Shundan plastik kartaga o‘tkazmalar 551 mlrd. so‘mni tashkil etdi, 498,4 mlrd. so‘mlik onlayn kreditlar rasmiylashtirildi, 88,7 mlrd. so‘mlik 1  438 ta, shu jumladan, baxtsiz hodisa va “COVID19”dan sug‘urtalovchi polisi bilan 3,2 mlrd. so‘mlik 94 ta omonat hisobvarag‘i ochildi, 5  080 ta karta muomalaga chiqarilib, egalariga yetkazib berildi.

Ilovaning faoliyat boshlaganiga bir yil to‘lishi munosabati bilan, shuningdek jamoatchilik o‘rtasida unga nisbatan qiziqish ortib borayotgani inobatga olinib, JOYDA jamoasi mijozlar uchun xizmatlar borasida yanada keng imkoniyatlar yaratilganligini ma’lum qiladi.

Ulardan biri O‘zsanoatqurilishbank filiallari, Bank xizmatlari markazlari hamda yirik korporativ mijozlar hududlarida tach skrin terminallarining ishga tushirilganligidir.

Mazkur qurilmalar aholiga bank xizmatlaridan muassasa xodimlari ishtirokisiz foydalanish imkonini beradi. Smartfonga ega bo‘lmagan mijozlarga esa JOYDA platformasining barcha qulayliklarini taqdim etadi.

Jumladan, mijozlar mazkur qurilmalar yordamida plastik kartaga buyurtma berishi, kredit va omonatlarini rasmiylashtirishi, mahsulotlarni muddatli to‘lov asosida xarid qilishi, valyuta almashtirishi, pul o‘tkazmalari, jarima yoki kredit uchun to‘lovlar singari ko‘plab amaliyotlarni amalga oshirishi mumkin bo‘ladi.

JOYDA ilovasi bilan bog‘liq yana bir yangilik – bu uning veb talqini ishga tushirilganidadir. Endilikda mijozlar kompyuter qurilmalari orqali ham JOYDA imkoniyatlaridan foydalana olishadi.

Joriy yilda JOYDA innovatsion platformasida yana qator yangi xizmatlar ishga tushirilishi rejalashtirilgan. Jumladan:

– 15 maydan overdraft krediti xizmati;
– 30 maydan JOYDA yordamida bank xizmatlariga navbatga turish xizmati;
– iyun oyidan boshlab O‘zsanoatqurilishbankning yangi xalqaro kartalarini JOYDA orqali boshqarish hamda xorijiy bank kartalariga pul o‘tkazmalarini amalga oshirish;
– iyul oyidan onlayn avtokredit xizmati;
– avgustdan mijoz bankka kelmay turib o‘z-o‘zini identifikatsiya qilish tizimi amaliyotga tadbiq etiladi.

Bir so‘z bilan aytganda, O‘zsanoatqurilishbank O‘zbekistondagi yetakchi banklaridan biri sifatida innovatsion bank xizmatlarini joriy qilib, aholi va tadbirkorlar uzog‘ini yaqin, og‘irini yengil qilishda davom etadi.

Bank Axborot xizmati