5-may kuni Adliya vazirligi va “Yuksalish” umummilliy harakati tomonidan Sardoba suv omborida yuz bergan ofat natijasida jabr ko‘rganlarga ko‘maklashish maqsadida e’lon qilingan “Salom, Sardoba, biz birgamiz!” xayriya aksiyasi doirasida to‘plangan navbatdagi gumanitar yuklar Sirdaryo viloyatiga yetkazildi.

Mazkur xayriyalar joriy yilning 3–5-may kunlari davomida Toshkent shahrida tashkil etilgan qabul punktiga faol fuqarolar, O‘zbekiston-Turkiya ishbilarmonlari uyushmasi (UTID), OOO “BEVERLee Business” kompaniyasi, Shodiyev fondi va bir qancha saxovatpesha tadbirkorlar hamda xalqaro tashkilotlar vakillari, Qizil yarim oy jamiyati tomonidan taqdim etildi. Xususan, mingdan ziyod odamga mo‘ljallangan bolalar va kattalar kiyimlari, sochiqlar, ko‘rpa-to‘shak va yostiqlar, oyoq kiyim, idish-tovoq, gigiyena vositalari, oziq-ovqat mahsulotlari, bolalar o‘yinchoqlari olib kelindi. Shuningdek, aksiya doirasida maxsus ochilgan hisob raqamga 100 milliondan ortiq mablag‘ kelib tushdi. Ushbu mablag‘lar talofat ko‘rgan sardobaliklarga o‘zlari bilan bevosita maslahatlashgan holda, ularning turmushini yaxshilash uchun zarur mahsulotlarga yo‘naltiriladi.

Bugun xayriya aksiyasiga o‘zining beminnat hissasini qo‘shishga oshiqqan saxovatpesha yurtdoshlarimiz, tadbirkorlarimiz xalqimizga xos odamgarchilik, bag‘rikenglik, hamjihatlilik kabi fazilatlarni yana bir bor namoyon etdi.

Barcha xayriyalar ko‘ngillilar tomonidan saralanib, 10 dan ziyod yuk mashinalariga joylandi hamda Sardobadagi talofatdan jabr ko‘rgan xalqimizga yetkazildi.