Bugun, 3-dekabr kuni Surxondaryo viloyati hokimligida videoselektor yig‘ilishi bo‘lib o‘tdi.

Yig‘ilishda Mamanov Fayzulla Bo‘riyevich Surxondaryo viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari – viloyat iqtisodiy taraqqiyot va kambag‘allikni qisqartirish bosh boshqarmasi boshlig‘i lavozimiga tayinlangani ma’lum qilindi.

F.Mamanov 1977-yilning 21-oktyabrida Qiziriq tumanida tug‘ilgan. 1999-yilda Toshkent irrigatsiya va qishloq xo‘jaligini mexanizatsiyalashtirish muhandislari instituti, 2004-yilda Toshkent moliya instituti, 2010-yilda O‘zbekiston Respublikasi Prezidenti huzuridagi Davlat boshqaruvi akademiyasini tamomlagan. Mutaxassisligi – muhandis, iqtisodchi.

U 2000-2005-yillarda O‘zbekiston Respublikasi Dehqon va fermer xo‘jaliklari uyushmasi, 2005-2008-yillarda O‘zbekiston liberal-demokratik partiyasi ijroiya qo‘mitasi apparati, 2008-2010-yillarda O‘zbekiston Fermer xo‘jaliklari uyushmasi, 2010-2013-yillarda O‘zbekiston Savdo-sanoat palatasi, 2013-2019-yillarda Savdo-sanoat palatasining Toshkent viloyati hududiy boshqarmasida mas’ul lavozimlarda ishlagan.

F.Mamanov 2019-yilning yanvaridan beri Toshkent viloyati, Toshkent tumani hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari – Iqtisodiy taraqqiyot va kambag‘allikni qisqartirish bo‘limi boshlig‘i sifatida faoliyat yuritib kelayotgan edi.

Eslatib etamiz, Surxondaryo viloyati hokimining moliya-iqtisod va kambag‘allikni qisqartirish masalalari bo‘yicha birinchi o‘rinbosari vazifasida ishlab kelgan Pardayev Rustam Ubodullayevich joriy yilning noyabr oyida Denov tumani hokimi etib tayinlangandi.