Respublika shoshilinch tibbiy yordam ilmiy markazi Samarqandda davolanayotgan bemorlar va tibbiyot xodimlarida COVID-19 infeksiyasi aniqlanganligi sababli markazning faoliyati 2020-yilning 19-may kunidan boshlab vaqtincha to‘xtatildi.

Samarqand viloyat sog‘liqni saqlash boshqarmasi axborot xizmatining xabariga ko‘ra, filialda dezinfeksiya va yuvish ishlarini amalga oshirilishi sababli bu yerda davolanayotgan 67 nafar bemor Respublika ixtisoslashtirilgan travmatologiya va ortopediya ilmiy-amaliy tibbiy markazi Samarqand filialiga o‘tkazildi.

Respublika shoshilinch tibbiy yordam ilmiy markazi Samarqand filiali faoliyati qayta yo‘lga qo‘yguniga qadar viloyat aholisiga quyidagi shifoxonalarda vaqtincha shoshilinch tibbiy yordam ko‘rsatiladi:

- travmatologik va neyroxirurgik (reanimatsiyasi bilan) tibbiy xizmatlar - Respublika ixtisoslashtirilgan travmatologiya va ortopediya ilmiy amaliy tibbiy markazi Samarqand filialida;

- xirurgiya, urologiya, ginekologiya, LOR, pediatriya, terapiya va reanimatsiya xizmati - SamMI 2-klinikasida;

- kombustiologiya (kuyish) tibbiy xizmati - Samarqand shahar tibbiyot birlashmasida;

- toksikologiya va EKD xizmati - viloyat ko‘p tarmoqli tibbiyot markazida.

Bundan tashqari, viloyat kardiologiya dispanseri, viloyat nogironlarni reablitatsiya qilish va protezlash markazi hamda viloyat ko‘z kasalliklari shifoxonasida shahar aholisi orasida koronavirus infeksiyasini yuqtirgan bemorlar bilan birlamchi kontaktda bo‘lgan fuqarolar karantin nazoratiga olinishi ma’lum qilindi.