Ertaga bo‘lib o‘tadigan Oliy Majlis hamda mahalliy kengash deputatligi uchun saylovlarda saylovchilar uchun eng kerakli ma’lumotlarni to‘plashga harakat qildim:

• ovoz berish ertalab soat 8:00 dan kechki 20:00 ga qadar davom etadi;
• o‘zingiz bilan pasport yoki yangi namunadagi haydovchilik guvohnomasini olishni unutmang;
• agar haligacha qaysi saylov uchastkasida ovoz berishingizni bilmasangiz, unda http://elections.uz/uz/site/polling-station manziliga kirib, tug‘ilgan sana va pasport raqamini kiritgan holda ertaga ovoz beradigan uchastkangizni aniqlashingiz mumkin;
• saylov byulletenini yashirin ovoz berish kabinasida yoki xonasida yolg‘iz o‘zingiz to‘ldirasiz;
• ovoz berish uchun o‘zingiz yoqlab ovoz berayotgan nomzodning familiyasi ro‘parasida, o‘ng tomonda joylashgan bo‘sh kvadratga «➕» yoki «✔️» yoxud «✖️» belgisini qo‘yishingiz kerak;
• to‘ldirgan saylov byulleteningizni saylov qutisiga tashlaysiz. O‘zingiz bilan esdalik uchun olib ketib qolmang;
• mabodo byulletenni buzib qo‘ysangiz, unda yangisiga almashtirib berishni iltimos qilishingiz mumkin;
• istalgan nomzodingizga ovoz berishingiz yoki hech kimga ovoz bermasligingiz mumkin (faqat imkoni bo‘lsa, byulletenni bo‘sh qoldirmang);
• saylovga borish ham majburiyat emas, huquq. Ammo avval ko‘p bora ta’kidlaganimizdek, albatta saylovga borish hamda nomzodlar orasida eng munosibi yoki nisbatan yaxshirog‘iga ovoz berishingiz tavsiya etiladi.