Respublikachilar partiyasidan amerikalik senator Rend Polning fikricha, Jo Baydenning AQSh prezidentligiga saylanishi mamlakatni ko‘plab urushlarga giriftor qiladi, deya xabar berdi «NBC News».

«Jo Bayden doimiy ravishda yangidan-yangi urushlarga chorlaydi. U Donald Tramp ancha vaqtgacha «avlodimizning eng yomon geosiyosiy xatosi» deb hisoblagan Iroqdagi mojaro uchun ovoz bergan. Bayden yana urushni tanlaydi deb qo‘rqaman. U Serbiya, Suriya va Liviyadagi urushlarni ham qo‘llab-quvvatlagan. Jo Bayden pulimizni sarflab, qonimizni to‘kishda davom etadi», — dedi senator Respublikachilar partiyasi yig‘ilishida.

Rend Pol Demokratlardan ko‘rsatilgan nomzoddan farqli o‘laroq Donald Trampni misol tariqasida keltirdi. U «yangi qurolli mojarolarni boshlash o‘rniga, ularni tugatishga intilyapti».

«Men Donald Trampni qo‘llab-quvvatlayman, chunki u ham men kabi kuchli Amerika uzluksiz urushlarni davom ettirolmaydi, deb hisoblaydi», — dedi senator.

Avvalroq Respublikachilar partiyasi Donald Trampni ikkinchi prezidentlik muddatiga rasman ilgari surgani ma’lum bo‘di. Amaldagi davlat rahbari delegatlarning kerakli 1276 ta ovozini to‘pladi.

AQShda prezident saylovi 3-noyabr kuni bo‘lib o‘tadi. Trampning asosiy raqibi Demokratlar partiyasidan nomzod Jo Bayden hisoblanadi.