Дональд Трамп Покистон бош вазири билан учрашув аввалида Афғонистонда бир ҳафтада ғалаба қозониш мумкинлиги ҳақида айтганини хабар бергандик.

Трампнинг сўзлари афғон ҳукуматига оғир ботди. Вашингтондан Трампнинг 7-10 кунда ғалаба қозониш ҳақидаги гапларига изоҳ талаб қилинмоқда.

«Афғонистон ва АҚШ ўртасидаги серқирра алоқаларни ҳисобга олган ҳолда, Афғонистон ислом республикаси ҳукумати дипломатик воситалар ва каналлар орқали АҚШ президентининг Покистон бош вазири билан учрашувдаги баёноти бўйича тушунтириш берилишини сўрайди», — Афғонистон президентининг котибияти расмий сайтига ушбу баёнот жойлаштирилди.

Эслатиб ўтамиз, президент Трамп Имрон Хон билан учрашувда АҚШ Афғонистондаги урушни 7-10 кунда тугата олишини, аммо буни истамаслигини, чунки 10 миллионлаб одамлар қирилиб кетиши мумкинлигини айтган эди.

АҚШ сўнгги ойларда ўт очишни тўхтатиш бўйича «Толибон» радикал ҳаракати билан, мамлакатдан чет эл қўшинларини олиб чиқиб кетиш ва тинчлик ўрнатиш бўйича Кобул ҳукумати билан музокаралар олиб боряпти.

Таъкидланишича, Афғонистон АҚШнинг мамлакатда тинчлик ўрнатиш бўйича интилишларини қўллаб-қувватлайди, бироқ хориж мамлакатлари раҳбарлари Афғонистон тақдирини унинг раҳбарияти иштирокисиз ҳал қилишга ҳақли эмас.