Республикачилар партиясидан америкалик сенатор Рэнд Полнинг фикрича, Жо Байденнинг АҚШ президентлигига сайланиши мамлакатни кўплаб урушларга гирифтор қилади, дея хабар берди «NBC News».

«Жо Байден доимий равишда янгидан-янги урушларга чорлайди. У Дональд Трамп анча вақтгача «авлодимизнинг энг ёмон геосиёсий хатоси» деб ҳисоблаган Ироқдаги можаро учун овоз берган. Байден яна урушни танлайди деб қўрқаман. У Сербия, Сурия ва Ливиядаги урушларни ҳам қўллаб-қувватлаган. Жо Байден пулимизни сарфлаб, қонимизни тўкишда давом этади», — деди сенатор Республикачилар партияси йиғилишида.

Рэнд Пол Демократлардан кўрсатилган номзоддан фарқли ўлароқ Дональд Трампни мисол тариқасида келтирди. У «янги қуролли можароларни бошлаш ўрнига, уларни тугатишга интиляпти».

«Мен Дональд Трампни қўллаб-қувватлайман, чунки у ҳам мен каби кучли Америка узлуксиз урушларни давом эттиролмайди, деб ҳисоблайди», — деди сенатор.

Аввалроқ Республикачилар партияси Дональд Трампни иккинчи президентлик муддатига расман илгари сургани маълум бўлди. Амалдаги давлат раҳбари делегатларнинг керакли 1276 та овозини тўплади.

АҚШда президент сайлови 3 ноябрь куни бўлиб ўтади. Трампнинг асосий рақиби Демократлар партиясидан номзод Жо Байден ҳисобланади.