Жаҳон киноси юлдузлари орасида шон-шуҳратнинг жуда мураккаб йўлларини босиб ўтганлар бор. «Викинглар» сериалидаги асосий роллардан бири орқали жаҳонга танилган Кэтрин Уинник билан ҳам шундай бўлган. Бу ҳақда «Рамблер» маълум қилди.

Бироқ, канадалик актриса Кэтрин Уинник аслида украиналик эканлигини ва ота-боболари 1940 йилда СССРдан қочиб кетишганини камдан-кам одамгина билади. Қизиғи шундаки, унинг бобоси Владимир Винницкий милтиқдан отиш бўйича мерган бўлган ва урушдан кейин фахрий мерганлар ташкилотига асос солган.

Кетриннинг она-отаси Роман ва Леся Винницкийлар нацистлар Германиясида туғилишган, кейинроқ эса Канадага кўчиб кетишган, аммо ҳатто ўша ерда ҳам ўзлигини унутишмаган – Торонтодаги украин мактабига ва черковига боришган.

Муҳожирлар оиласидан бўлган қизга шон-шуҳрат йўллари Ню-Йоркдаги актёрлик мактабидан бошланган, у айнан шу ерда керакли танишлар орттиришга ва дастлабки ролларни олишга муваффақ бўлган. 2010 йили у режиссёр Роберт Лукетичнинг «Қотиллар» комедиясида суратга тушди.

Дунёдаги бир қатор машҳур телешоулар, жумладан, «Доктор Хаус», «Қонун ва тартиб», «Жиноятчи каби фикрлаш» каби сериаллар Кэтринга янада шуҳрат олиб келди. Унинг «Викинглар» сериалидаги жангчи Лагерта роли миллионлаб мухлислар эътиборини қозонди. Ўшанда актриса таэквондодаги истеъдодини ишга солганди – Кэтрин таэквондо бўйича қора белбоғ, каратэда 2-дан соҳиби ва тансоқчилик лицензиясига эга.

У.Йўлдошев тайёрлади