АҚШнинг амалдаги ва истеъфодаги ҳарбийлари АҚШ президенти Жо Байденнинг руҳий ва жисмоний ҳолатини шубҳа остига қўйган 124 нафар генералнинг очиқ хатини танқид қилишди.

Истеъфодаги полковник Жефри Маккосланд The Huffing Postга берган интервьюсида президент сайловлари натижаларини қайта кўриб чиқишга олиб келиши мумкин бўлган бундай «антидемократик кампанияда» иштирок этиш хавфли эканини қайд этган. Унинг таъкидлашича, ушбу ҳужжат хавфли оқибатлар келтириб чиқариши мумкин, чунки Қўшма Штатлар «ҳарбийлар ҳеч қачон ҳокимиятни эгаллаб олиш билан таҳдид қилмаган кам сонли демократик давлатлардан бири» ҳисобланади.

Собиқ денгиз пиёда аскари Алекс Маккой, ўз навбатида, истеъфодаги генералларнинг хатини хиёнат деб атади.

Эслатиб ўтамиз, олдинроқ истеъфодаги америкалик генераллар Байден танқид остига олинган очиқ хатга имзо чекиб, «миллат катта хавф остида» дея таъкидлагандилар. Уларнинг фикрига кўра, мамлакат раҳбарининг жисмоний ва руҳий ҳолати унга миллий хавфсизлик соҳасида қарор қабул қилишга имкон бермайди.