Польша миллий хотира институти Жеймс Бонд исмли инсон мамлакатга ўтган асрнинг 60-йилларида келганидан далолат берувчи ҳужжатларни аниқлади. Бу ҳақда «Facebook»да хабар берилди.

Британия элчихонасида ҳарбий атташе бўлиб ишлаган Жемс Бонд Польша контрразведка хизмати кузатуви остида бўлган.

Польша махфий хизматлари, жосусликда гумон қилиб, машҳур фильм қаҳрамонининг адашини тинмай кузатиб боришган, шунга қарамай, институт ҳаётдаги Бонд жиддийроқ қонунбузарлик қилгани ҳақида ҳеч қандай далилга эга эмас. Архивга кўра, Бонд жуда эҳтиёткор ва кинодаги адаши каби аёлларнинг қалбига йўл топишда устаси фаранг бўлган.

Мавзуга оид: Жеймс Бондларнинг энг зўри аниқланди (фото)

Ҳаётдаги Жеймс Бонд камида икки марта (1964 йил октябрь ва ноябрь ойлари) ҳарбий объектларга киришга уриниб кўргани айтилади. У 1965 йилнинг бошларида Польша ҳудудини тарк этган.

Худди шу пайтга келиб инглиз ёзувчиси Ян Флемингнинг жосус Жеймс Бонд ҳақидаги барча китоблари чоп этилган, айримлари экранларга ҳам чиқишга улгурганди.

Яқин-яқинларгача Агент 007 — Жеймс Бонд Ян Флеминг яратган тўқима образ саналарди, ҳолбуки, ҳаётда унинг прототиплари бўлган экан.