Қатар кўчаларида кондиционерлар ўрнатилмоқда, деб ёзяпти «Daily Mail». Хабарларга кўра, ҳозир бу мамлакатда ҳаво ҳарорати Цельсий бўйича 46 даражага чиқиб кетган.

Ана шу жазирама инобатга олиниб ҳам Қатардаги футбол бўйича жаҳон чемпионати ҳаво салқинроқ пайт — ноябрь-декабрь ойларига белгиланган.

Қатардаги стадионларга 2018 йилиёқ кондиционерлар ўрнатиб бўлинган.

Инглиз нашри ёзадики, янада салқинроқ бўлиши учун мамлакат пойтахти Доҳада яна бир чорани синаб кўришяпти — автомобиль йўлларидан бирини кўк рангга бўяб чиқишяпти. Мутахассислар кўк ранг қуёш нурини яхши қайтаради дейишмоқда, яъники «кўк кўча» кам қизиб, ҳавога ҳам кам иссиқ чиқаради. Муҳандисларнинг айтишларича, оддий асфальт кундузи иссиқни тинмай ютгани учун ҳавога нисбатан 20 даража иссиқроқ бўлади.

Қўшимчасига янги қоплама таркибида инфрақизил нурланишни қайтарувчи махсус керамик микросфералар ҳам бўлади. Синов тариқасида 250 метрлик шунақа йўлни қуришди. Жазирамага қарши бунақа усуллар дунёнинг бошқа шаҳарларида қўлланилмоқда. Масалан, Лос-Анжелесда совитувчи бўёқ билан қопланган трассалар бор.