Уддабурон йўловчи ортиқча юк учун пул тўламаслик йўлини топди ва чамадонидаги кийимларнинг бир қисмини эгнига кийиб олди. Бу ҳақда «Рамблер» хабар берди.

Гель Родригес рўйхатга олиш пештахтасига чамадони билан келганида аэропорт ходими унинг юки ҳаддан ташқари оғир эканини маълум қилади. Шунда саёҳатчи қиз сумкасини очиб, кийимларини устма-уст кия бошлайди.

Шу тариқа Родригес умумий оғирлиги 2,5 килограмм келадиган учта шим ва шортик, бешта кўйлак ва учта курткани эгнига кийиб олади. Қиз шу кўринишда самолёт сари юради.

Кейинроқ у эгнидаги кийими билан расмга тушиб, ижтимоий тармоқларга жойлади. Қизнинг пости вирус каби тарқалиб, кўплаб изоҳларга сабаб бўлди.

Бу саёҳатчилар аэропортда ортиқча юкка пул тўламаслик учун кийимларнинг бир қисмини кийиб олган биринчи ҳолат эмас. Мана, масалан, июлда шотландиялик Жон Ирвин оиласи билан «EasyJet» авиакомпаниясида Ниццадан Эдинбургга қайтиб келаётганда саккиз кило кийимни эгнига кийиб олишган. Рўйхатга олиш пештахтасида сайёҳга унинг юки рухсат этилганидан саккиз кило ошиб кетганини маълум қилишади. Бироқ Ирвин ортиқча юкка пул тўлашдан бош тортган.