АҚШ президенти Доналд Трампнинг фикрича, Франциянинг Фаластин давлатчилигини тан олиши Яқин Шарқда ҳеч нарсани ўзгартирмайди.

Америка етакчисининг айтишича, Франция президенти Эммануэл Макроннинг сентябр ойида БМТ Бош Ассамблеясида Фаластинни тан олиш нияти ҳақидаги баёноти “муҳим нарса эмас”. 

“Унинг айтганлари муҳим эмас”, деди Доналд Трамп журналистларга Франция президентининг баёнотини изоҳлар экан (Reuters иқтибос келтирган). "Бу ҳеч нарсани ўзгартирмайди", деб қўшимча қилди у. 

"Макрон жуда яхши йигит", деди Америка раҳбари. "Менга ёқади, лекин бу баёнот ҳеч қандай юк босмайди". 

ҲАМАС вакиллари Макроннинг баёнотларини “Фаластин халқи учун адолатга эришиш йўлидаги ижобий қадам” деб атади. АҚШ ва Исроил Франция раҳбарининг баёнотларини қоралади. 

Пайшанба куни Франция президенти Эммануэл Макрон сентябр ойида БМТ Бош Ассамблеясида Париж Фаластинни тан олишини айтди. Бу қарор Исроил ва АҚШ расмийлари томонидан танқид қилинди.

Британия Бош вазири Кир Стармер ўша куни "давлатчилик Фаластин халқининг ажралмас ҳуқуқи" эканлигини ва ўт очишни тўхтатиш Британияни "тан олиш йўлига" бошлашини айтди. Шу билан бирга, жаноб Стармер Лондон ўз позициясини расмийлаштиришга тайёрми ёки йўқлигини аниқ айтмади. 2024 йилдан бери Фаластинни Ирландия, Норвегия, Испания ва Арманистон каби ўнта давлат расман тан олган. Фаластин мустақиллиги халқаро майдонда 147 давлат, жумладан, Ўзбекистон, Россия ва Хитой томонидан тан олинган.