Германиянинг машҳур BMW компанияси ўзининг энг харидоргир ва севимли кроссоверларидан бири — BMW X5 моделининг янги авлодини расман намойиш этди. Бу шунчаки ташқи кўринишни янгилаш эмас, балки автомобиллар дунёсида катта бурилиш ясайдиган бутунлай янги лойиҳадир.

Энди янги X5 ни хоҳишингизга қараб мутлақо бошқа-бошқа моторлар билан сотиб олишингиз мумкин. У бир вақтнинг ўзида беш хил версияда чиқарилади:

1. Оддий бензинли;
2.  Тежамкор дизелли;
3. Электр ва бензинда юрадиган икки хил гибрид версия;
4. Мутлақо электрли (iX5) версия.

Кейинчалик ушбу қаторга водород ёқилғисида (энг экологик тоза тизимда) ҳаракатланувчи тури ҳам қўшилади.

Тўлиқ электрли версия бир марта қувватланиш билан 845 километргача йўл юра олади. Илғор гибрид версияси эса бензин баки тўлдирилса ва батареяси зарид қилинса, жами 2000 километргача масофани босиб ўтади. Тасаввур қилишингиз учун, бу деярли Тошкентдан Олмаотага бориб, қайтиб келишга ҳам етади.

Машинанинг ташқи кўриниши бутунлай ўзгарди ва анча замонавий (футуристик) тус олди:

• Фаралари ичида «Х» шаклидаги чироқлар пайдо бўлди;
• Эшик тутқичлари кузов ичига яширинган ва сенсорли;
• Машинанинг шакли ҳаво қаршилигини минимал даражага туширадиган қилиб силлиқланган. Бу эса ёқилғи ва токни тежашга ёрдам беради.

Энди рул ортидаги оддий спидометрлар йўқ. Энг муҳим маълумотлар (тезлик, харита) тўғридан-тўғри олд ойнанинг пастки қисмига проекция қилиб чиқарилади. Бу ҳайдовчи йўлдан кўзини узмай машинани бошқаришига ёрдам беради.

Салон ўртасида 17,9 дюймли улкан планшет жойлаштирилган. Салонда оддий пластик ўрнига илк бор табиий сланец (чиройли тош қатлами) ва юқори сифатли экологик матолардан фойдаланилган.

Янги BMW X5 моделлари жаҳон бозорида расман 2026 йилнинг охирида сотувга чиқади. Унгача эса автомобил ҳақидаги қўшимча деталлар ва нархлар аниқ бўлади. Экспертларнинг фикрича, ушбу модел ўз рақобатчилари бўлган Mercedes-Benz GLE ва Porsche Cayenneни анча ортда қолдириши мумкин.