Tailand O‘zbekiston fuqarolari uchun 15-iyuldan vizasiz tartibni joriy qildi, deb xabar berdi «Dunyo» axborot agentligi.

Endi o‘zbekistonliklar ushbu davlatga 60 kungacha vizasiz kirish huquqiga ega. Bungacha O‘zbekiston fuqarolari aeroportga kelganlarida 60 dollar evaziga 15 kunlik turistik viza olishlari mumkin edi.

Mamlakatimiz Bosh konsulxonasi ma’lumotiga ko‘ra, muqaddam Tailandga fuqarolari vizasiz kirishi mumkin bo‘lgan davlatlar soni 57 ta edi. Ro‘yxatga yangi kiritilgan 36 ta davlat qatorida Xitoy, Hindiston, Qozog‘iston va O‘zbekiston ham bor.

Yangi tartib barcha chegara postlari orqali Tailandga tashrif buyuruvchilar uchun amal qiladi.

O‘z navbatida, mazkur tartib Tailand hukumati tomonidan iqtisodiyotni rivojlantirish maqsadida bir tomonlama joriy etildi va ma’lum muddatdan so‘ng bekor qilinishi ham mumkin.

Tailand TIV ma’lumotiga ko‘ra, O‘zbekiston va Tailand o‘rtasida o‘zaro vizadan ozod qilish bo‘yicha ishlab chiqilayotgan hukumatlararo kelishuvlar yuzasidan muzokaralar davom etmoqda.