Marmaris – Turkiyaning ajoyib tabiatli sohilbo‘yi shahri
![Marmaris – Turkiyaning ajoyib tabiatli sohilbo‘yi shahri](http://static.xabar.uz/crop/3/9/920__95_3927598650.jpg)
Marmaris – Turkiyaning janubi-g‘arbiy qismida, Egey va O‘rta yer dengizi chorrahasida joylashgan noyob port shaharlardan biridir. Marmaris o‘zining ajoyib tabiati, musaffo dengizi, tarixiy boyliklari va jonli tungi hayoti bilan dam oluvchilarni o‘ziga jalb qilib kelmoqda.
Plyajlar va tabiiy mo‘’jizalar
Ichmeler plyaji: Ichmeler plyaji Marmaris markazidan taxminan 8 km uzoqlikda joylashgan bo‘lib, o‘zining mayin qumi va sokin dengizi bilan nom chiqargan. Plyajda suv sporti bilan shug‘ullanish yoki dengizdan bahra olish mumkin.
Turunch plyaji: Turunch plyajiga Marmarisdan qatnaydigan qayiq bilan borsa bo‘ladi, ushbu plyaj tinch va osoyishta muhitda dam olishni istaganlar uchun ayni muddao. Turunchning shaffof suvlarida suzish betakror zavq bag‘ishlaydi.
Kumlubuk plyaji: Marmarisning eng toza va eng chiroyli plyajlaridan biri bo‘lgan Kumlubuk o‘zining bebaho tabiati bilan boshqa joylardan batamom farqlanadi va tabiatsevarlarning eng sevimli dam olish maskaniga aylanib ulgurgan.
Marmaris milliy bog‘i: Tabiatda sayr qilish va osoyishta muhitda orom olish uchun ideal bo‘lgan ushbu park Marmarisning ajoyib tabiatini kashf qilishni xohlaydiganlar uchun takrorlanmas imkoniyatdir.
Tarix va madaniyat
Marmaris qal’asi va arxeologiya muzeyi: Marmaris qal’asining tarixi miloddan avvalgi 1 044 yilga borib taqaladi va bugungi kunda qal’ada Marmaris arxeologiya muzeyi joylashgan. Muzeyda viloyat tarixiga oid muhim asarlar va osori-atiqalar mavjud.
Knidos qadimiy shahri: Knidos qadimiy shahri Marmarisdan taxminan 1,5 soat uzoqlikda joylashgan bo‘lib, o‘zining qadimiy xarobalari va taassurotga boy manzarasi bilan tashrif buyuruvchilarni maftun etadi.
Faoliyat va o‘yin-kulgi
Qayiq sayohatlari: Marmarisdan tashkil etilgan qayiq sayohatlari bilan atrofdagi ko‘rfazlar va orollarni kashf qilish mumkin. Dalyan, Kleopatra oroli va Sedir oroli kabi mashhur sayyohlik manzillari tabiat va tarixsevarlar uchun mukammal «bekatlar»dir.
Suv sporti: Marmarisda jet ski (suv sporti), suv chang‘isi va shamol syorfing kabi ko‘plab suv sportlarini nafaqat sinab ko‘rish, balki hayajonga boy sarguzashtga ega bo‘lish mumkin. Shuningdek, sho‘ng‘ish ixlosmandlari uchun o‘rganishga arzigulik Marmarisning suv osti dunyosi mavjud.
Jip Safari: Marmarisning tabiiy go‘zalliklari va qishloq hayotini kashf qilish uchun jip safarlariga chiqish mumkin. Ushbu sayohatlar qiziqarli va ma’lumot beruvchi tajribani ta’minlaydi.
Tungi hayot: Marmarisning tungi hayoti juda jonli va tunni qizg‘in o‘tkazadiganlar uchun ko‘plab variantlarni taklif etadi. Marmaris o‘zining jonli musiqa barlari, tungi klublari va turli ko‘ngilochar joylari bilan tungi hayotni sevuvchilar uchun shohona tajriba taqdim etadi.
Xarid qilish va oziq-ovqat va ichimliklar
Mahalliy lazzat: Marmarisda dengiz mahsulotlaridan taom tayyorlaydigan restoranlarning koni mavjud. Bundan tashqari, turk oshxonasining lazzatlarini taqdim etadigan restoranlar ham yo‘q emas. Ayniqsa, tami og‘izda qoladigan yangi baliq va gazaklardan tatib ko‘rish tavsiya qilinadi.
Marmaris Grand bozor: Ushbu bozorda hadya va esdalik uchun mahalliy hunarmandchilik, zargarlik buyumlari, to‘qimachilik mahsulotlari va aksessuarlar sotiladi.
Marmaris barcha turdagi dam oluvchilarni o‘ziga jalb qiladigan joy sifatida unutilmas dam olish tajribasini taqdim etadi. Shuningdek, ajoyib plyajlar, tarixiy va madaniy boyliklari, tabiiy mo‘’jizalari va jonli tungi hayoti bilan dam olishingizni to‘la-to‘kis o‘tkazish imkonini beradi. Marmarisdagi ta’til sizga dam olish va kashfiyot nuqtai nazaridan noyob xotiralarni beradi.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter