Singapur hukumati tug‘ilish darajasining keskin pasayishi fonida oilalarni qo‘llab-quvvatlash choralarini kengaytirmoqda. Yangi dastur doirasida har bir talablarga javob beradigan Singapur fuqarosi bo‘lgan bolaga tug‘ilganidan 17 yoshgacha jami qariyb 70 ming Singapur dollari (taxminan 649 million O‘zbek so‘mi) miqdorida to‘g‘ridan-to‘g‘ri moliyaviy ko‘mak beriladi.

Bu summa AQSh valyutasida qariyb 55 ming dollarga teng.

Muhim jihati, 55 ming AQSh dollari ota-onaga bola tug‘ilishi bilan bir yo‘la beriladigan pul emas. Bu bola tug‘ilganidan 17 yoshgacha turli to‘lovlar va jamg‘armalar orqali bosqichma-bosqich ajratiladigan umumiy moliyaviy paketdir.

Yangi SG Child Support Package dasturining o‘zi har bir bola uchun 62 ming Singapur dollarigacha (taxminan 574,8 million so‘m) yordamni nazarda tutadi.

Bunga yangi tug‘ilgan chaqaloq uchun amaldagi MediSave granti va maktab yillarida beriladigan jami qariyb 2,5 ming Singapur dollari (taxminan 23,2 million so‘m) miqdoridagi Edusave mablag‘lari ham qo‘shiladi.

Shu tariqa, davlat tomonidan bir bolaga ko‘rsatiladigan umumiy moliyaviy ko‘mak qariyb 70 ming Singapur dollariga (taxminan 649 million so‘m) yetadi.

Dastur tug‘ilish darajasi tarixiy minimumga tushib ketgani ortidan joriy etilmoqda. 2025 yilda Singapurda umumiy tug‘ilish koeffitsiyenti bir ayolga 0,87 nafar bolani tashkil etgan. Aholi sonini tabiiy ravishda barqaror saqlash uchun esa bu ko‘rsatkich taxminan 2,1 bo‘lishi kerak.

Moliyaviy yordamdan tashqari, hukumat bola parvarishi ta’tilini uzaytirish va bog‘cha xarajatlarini kamaytirishni ham rejalashtirgan. 2030 yilga borib davlat qo‘llab-quvvatlaydigan muassasalarda to‘liq kunlik bolalar bog‘chasi to‘lovini oyiga 150 Singapur dollarigacha (taxminan 1,39 million so‘m), chaqaloqlar parvarishi uchun to‘lovni esa 300 Singapur dollarigacha (taxminan 2,78 million so‘m) tushirish rejalashtirilgan.