Flydubai авиакомпанияси Дубайдан Тел-Авивга учаётган Boeing 737 MAX 8 самолёти билан боғлиқ ҳодиса юзасидан тергов олиб борилаётган вақтда Исроилга ва Исроилдан амалга ошириладиган барча рейсларни вақтинча тўхтатишга қарор қилди.

«Вақтинчалик тўхтатиш тегишли органларга ишларини давом эттириш ва ҳодисанинг барча тафсилотларини аниқлаш имконини беради», — деди Flydubai расмийси.

Унинг сўзларига кўра, авиакомпания Бирлашган Араб Амирликлари (БАА) ҳукумати ва бошқа «манфаатдор томонлар» билан ҳаракатларини яқиндан мувофиқлаштирмоқда. Рейсларни қайта тиклаш тўғрисидаги қарор қўшимча маълумотлар олиниши билан қабул қилинади.

Ҳодиса юз берганидан сўнг Исроил транспорт вазири Мири Регев Flydubai’нинг Исроилга барча рейсларини бекор қилишни талаб қилди. У Фуқаро авиацияси бошқармасини БАА Исроил билан тузилган авиация келишувини бузган-бузмаганини текширишга чақирди. Келишувга кўра, мамлакатга фақат Исроил билан дипломатик муносабатларни қўллаб-қувватловчи давлатлар паспортига эга учувчилар қўниши мумкин.

Flydubai самолётини эгаллаб олишга уриниш

Flydubai’нинг Дубайдан Тел-Авивга FZ1073 рейси билан учаётган йўловчи самолёти 30 сентябр куни маҳаллий вақт билан тахминан соат 09:00 да самолётни эгаллаб олишга уриниш сигнали берилгач, Саудия Арабистонининг Табук шаҳридаги аэропортга фавқулодда қўнган.

Ҳодиса учувчилар кабинасидаги жанжал сабаб юзага келгани тахмин қилинмоқда. Асосий версияга кўра, иккинчи учувчи борт командирига пичоқ билан ҳужум қилиб, самолёт бошқарувини ўз қўлига олишга уринган. Кураш вақтида самолёт Саудия Арабистони ҳудуди устида атиги 29 сонияда 9410 метрдан 5105 метргача кескин пасайган.

Boeing 737 MAX 8 бортида 174 киши, жумладан, 27 нафар бола бўлган. Уларнинг аксарияти Исроил фуқаролари эди.

Айрим йўловчиларнинг сўзларига кўра, дастлаб учувчилар кабинасидан бақириқ овозлари эшитилган. Кейин кабина эшиги очилиб, йўловчилар учувчилардан бири жароҳатланганини ва кийимлари қонга беланганини кўрган. Унга биринчи тиббий ёрдам кўрсатилган, йўловчилардан бири шифокор бўлган. Экипаж аъзолари ва йўловчилар ҳужум қилган шахсни зарарсизлантиришга муваффақ бўлган.

Самолётни Саудия Арабистонига бортда йўловчи сифатида кетаётган икки нафар бошқа учувчи қўндирган. CNN маълумотига кўра, улар кейинги рейсни амалга ошириши керак бўлган «захира учувчилар» бўлган.

Israel Hayom нашри уларнинг бири украиналик, иккинчиси россиялик бўлганини ёзди. Бироқ бу маълумот расман тасдиқланмаган. Шунингдек, самолётни Жанубий Африка Республикаси ва Янги Зеландия фуқаролари қўндирган бўлиши мумкинлиги ҳақида ҳам хабарлар тарқалган.