Илон Маск АҚШ ҳукумати билан яна расмий ҳамкорлик қилади. У Пентагоннинг келажакдаги урушлар ва янги ҳарбий технологияларни ўрганишга қаратилган Project Meridian лойиҳасига ҳамраислик қилади.

Лойиҳага Маск билан бирга Anduril Industries асосчиси Палмер Лаки ва АҚШ Вакиллар палатасининг собиқ спикери Ньют Гингрич раҳбарлик қилади. Пентагон раҳбари Пит Хегсетнинг айтишича, гуруҳ келажак жанговар майдонларини, зарур қурол-яроғ ва технологияларни ўрганади.

Project Meridian ишига хусусий сектор, технология, академик ва сиёсий доира вакиллари ҳам жалб қилинади. Лойиҳа иштирокчилари ўз хулоса ва тавсияларини 120 кун ичида тақдим этиши керак.

Маск аввал Дональд Трамп маъмуриятида DOGE — давлат бошқаруви самарадорлигини ошириш ташаббусида иштирок этган, кейин эса 2025 йил майида ҳукуматдаги фаолиятини якунлаган. Янги тайинлов унинг маъмурият билан расмий ҳамкорликка қайтиши сифатида баҳоланмоқда.

Маскнинг SpaceX компанияси ҳам Пентагон билан йирик мудофаа ва космик лойиҳаларда ҳамкорлик қилиб келади.