Адлия вазирлиги Ўзбекистон Республикасида валюта операцияларини амалга ошириш қоидаларининг 28-бандига киритилган ўзгартиришни давлат рўйхатидан ўтказди. Ҳужжат 2026 йил 16 июл куни 3281-6-сон билан рўйхатдан ўтган.

«Валютани тартибга солиш тўғрисида»ги Қонуннинг 15-моддасига мувофиқ, жорий халқаро операциялар билан боғлиқ ҳолларда чет эл валютасини сотиб олиш ёки сотиш чекловларсиз амалга оширилади.

Амалдаги тартибга кўра, махсус валюта ҳисобварақларига ўтказилган маблағлар фақат буюртмада кўрсатилган мақсадлар учун сарфланиши шарт.

Шу вақтгача бир шартнома доирасида сотиб олинган валюта маблағларидан бошқа шартнома учун фойдаланиш зарурати туғилганда, тадбиркорлар аввал валютани банкка сотиши, кейин эса янги мақсад учун қайта сотиб олиши талаб этилар эди.

Бу эса тадбиркорлар учун ортиқча вақт ва қўшимча операцияларни талаб қиларди. Киритилган ўзгартириш билан ички валюта бозоридан сотиб олинган валюта маблағларидан фойдаланиш мақсадини ўзгартириш имконияти яратилмоқда.