Рақобат қўмитаси «Perfectum» мобил операторига эгалик қилувчи компания улушининг 50 фоизини сотиб олиш бўйича иқтисодий концентрация битимини маъқуллади.

Рақобат қўмитаси фуқаро Ф. Маматджановнинг «Rubicon Wireless Communication» МЧЖ устав капиталидаги 50 фоиз улушни сотиб олиш бўйича иқтисодий концентрация битимига розилик бериш ҳақидаги аризасини кўриб чиқди.

«Rubicon Wireless Communication» МЧЖ мамлакатда «Perfectum» савдо белгиси остида мобил алоқа хизматларини кўрсатувчи оператор ҳисобланади.

Рақобат қўмитаси Махсус комиссияси хулосасига кўра, мазкур иқтисодий концентрация товар бозорида рақобат муҳитига салбий таъсир кўрсатмайди. Шундан келиб чиқиб, аризани қаноатлантириш ва битимга расмий розилик бериш тўғрисида қарор қабул қилинди.

«Perfectum»нинг 50 фоиз улушини олган Ф. Маматджанов «INFINBANK» АЖ 45,697 фоиз улушига эга. Шунингдек, у «UZTEX TASHKENT», «AZIA TRANS TERMINAL», «RAKAT PLAZA», «SOFA MARVA TOUR», «TERASSA» МЧЖлари ва «SAFO AIRLINES» МЧЖ ҚК таъсисчиларидан ҳисобланади.