Япониянинг Tokyo Electric Power Services Co. (TEPSCO) компанияси Ўзбекистонда энергетика тизимини ривожлантириш бўйича ҳамкорликни кенгайтириш ниятида. Бу ҳақда Токио шаҳрида бўлиб ўтган учрашувда ширкат вакиллари маълум қилди, деб хабар бермоқда Xabar.uz мухбири. 

«Ўзбекистонда сўнгги 15 йилда кўплаб лойиҳаларни амалга оширдик. Жумладан, 2015-2022 йилларда Тўрақўрғон иссиқлик электр станцияси қурилишида муносиб даражада консалтинг хизмати кўрсатдик. Навоий иссиқлик электр станциясини модернизация қилиш бўйича йирик лойиҳада ҳам иштирок этдик. Компаниямиз техник-иқтисодий асослаш, лойиҳалашдан тортиб қурилиш ва хизмат кўрсатишга қадар бўлган хизматларни қамрайди. Ўзбекистон билан ҳамкорлик ижобий натижа бермоқда. Биз ушбу ҳамкорликни изчиш давом эттириш ниятидамиз», — деди TEPSCO компаниясининг халқаро лойиҳалар бўлими бош менежери Шинсаку Ёшимизу.

Маълумот ўрнида: Навоий ИЭСда бунёд этилаётган навбатдаги 3-сонли буғ-газ қурилмасининг ўрнатилган қуввати 650 МВтни ташкил этади. Молиялаштириш манбаи JICA (Япония халқаро ҳамкорлик агентлиги) маблағлари бўлиб, лойиҳанинг шартнома қиймати 128,2 млрд иенани ташкил этади.

Япон ширкати, шунингдек, энергетика сектори салоҳиятини ошириш йўналишида Тошкент, Навоий ва Тўрақўрғон ИЭСларида кадрлар тайёрлаш ва эксплуатация ишларини оптималлаштириш лойиҳасида ҳам қатнашмоқда. Лойиҳа техник хизмат ва самарали бошқарувни таъминлаш учун инсон ресурсларини ривожлантиришни кўзда тутади. 36,6 млрд иеналик кредит шартномаси 2021 йил 14 апрелдан 2027 йил 14 июнга қадар амалга татбиқ этилади.

«Ушбу лойиҳа бўйича TEPSCO ўзбекистонлик мутахассисларни Японияда ўқитмоқда. Биз иш фаолиятимизда ягона ойна  тамойилига асосланган комплекс ёндашув орқали юқори хизмат кўрсатишга интиламиз», — деди компаниянинг жамоатчилик билан алоқалар офиси бош менежери Ҳиро Ҳасегава.

TEPSCO дунёнинг 20 га яқин давлатида, жумладан, Озарбайжон, Ветнам, Миср, Малайзия, Бангладеш, Индонезия, Уганда, Мозамбик, Мянма ва Тайванда офис ҳамда шўъбаларга эга.

Электр энергетикаси соҳасида етакчилардан бири деб тан олинган компания JICA, Жаҳон банки, Осиё тараққиёт банки каби донорлар кўмагида бутун дунёда, хусусан, Осиё, Яқин Шарқ ва Шарқий Европада энергетика бўйича лойиҳаларни амалга татбиқ этмоқда.

Маълумки, 2015 йилнинг сентябр ойида БМТ саммитида 2030 йилгача Барқарор ривожланиш мақсадлари тасдиқланган эди. TEPSCO ўз фаолияти мобайнида мазкур мақсадлар рўёбига ҳисса қўшишни ҳам кўзда тутади.

Компания фақат иссиқлик электр станциялари билан чекланиб қолмай, гидроэнергетика, электр тармоқлари, қайта тикланувчи энергия,  рақамли ечимлар бўйича ҳам фаолият юритади.

Компаниянинг кўплаб лойиҳалари ODA (Official Development Assistance) — Япония ҳукуматининг расмий ёрдами ҳисобидан амалга оширилади.

Аввал хабар берганимиздек, Ўзбекистон президенти Шавкат Мирзиёев 2025 йил 20 декабр куни Токио шаҳрида бўлиб ўтган «Марказий Осиё + Япония» мулоқотининг биринчи саммитида Япониянинг зарарли газларни атмосферага чиқаришни тўлиқ бартараф этишга эришиш борасидаги тажрибасини эътироф этиб, Япония томони билан «яшил» энергетикани ривожлантириш бўйича самарали иссиқлик станциялари, қуёш ва шамол энергия қурилмаларини барпо этиш лойиҳаларини биргаликда ишлаб чиқишни таклиф этганди.

Икки давлат ўртасида шакллантирилган қиймати 12 миллиард доллардан ортиқ бўлган янги кооперация лойиҳалари портфелида ҳам кўплаб соҳалар қатори энергетика бўйича қўшма лойиҳаларга алоҳида эътибор қаратилганди.